بەهۆی ڕووداوێکی هاتوچۆ هاوڵاتیەک گیانی لەدەستدا

گوتەبێژی ھاتوچۆی ڕاپەڕین ئاشکرای کرد، پاشنیوەڕۆی ئەمڕۆ دووشەممە 9ی 9ی 2024، لەسەر ڕێگەی ھیزۆپ بۆ چوارقوڕنە لە ڕووداوێکی ھاتوچۆدا كەسێك گیانی لە دەست دا و كەسێكی دیكەیش بریندار بوو، دەستبەجێ قوربانییەكان گواسترانەوە نەخۆشخانە.
لەسەر ئەو ڕووداوە، عەلی عەبدوڵڵا، گوتەبێژی پۆلیسی ھاتوچۆی ڕاپەڕین  ڕایگەیاند: "ڕووداوەکە لە نزیک گوندی کڵاوسوران بووە، کە ئۆتۆمبلێکی جۆری تـۆیـۆتـا لانـدگـرۆزور کۆنـتڕۆڵی لەدەسـت داوە و وەرگەڕاوە."
گوتیشی: "بەھۆی ڕووداوەکە سەر نشینێکی ئۆتۆمبێلەکە بەناوی محەممەد ئەنوەر، کە خەڵکی شاری کۆیەیە و ھەفتەیەکە ھاوسەرگیری کردووە، گیانی لەدەست دا و شوفێرەکەش بریندار بوو."
باسی لەوەش کرد: "دوای ڕووداوەکە پۆلیس گەیشتە شوێنەکە و قوربانییەکان گواسترانەوە نەخۆشخانە و لێکۆڵینەوەش لە ڕووداوەکە دەستی پێکردووە."