وەزارەتی پەروەردە بڕیارێك بۆ رۆژانی دەوامی دەستەی كارگێڕیی قوتابخانەكان دەردەكات و بەرپرسێكی مامۆستایانیش وردەكارییەكەی ئاشكرا دەكات.
بەپێی نووسراوێكی وەزارەتی پەروەردەی حكوومەتی هەرێمی كوردستان، كە ئەمڕۆ 15ی 8ی 2024 دەرچووە ئەوە هاتووە: "بەهۆی تاقیكردنەوە گشتییەكانی خولی دووەمی پۆلی 12ی ئامادەیی، دەوامی دەستەی كارگێڕیی ناوەندەكانی خوێندن دەخرێتە رۆژانی یەكشەممە و پێنجشەممە."
لای خۆیەوە، ئەحمەد گەرمیانی، سەرۆكی یەكێتیی مامۆستایان، راگەیاند: "مانگی حەوت و هەشت ساڵانە بەڕێوەبەر و یاریدەرەكانیان و فەرمانبەرانی ئیدارەی قوتابخانەكان، رۆژانی یەكشەممە و چوارشەممەی هەموو هەفتەیەك، بۆ رێكخستنی بایەتی وەرگرتنی قوتابییان و میلاكات و گواستنەوە دەوامی خۆیان دەكەن، بەڵام بەهۆی تاقیكردنەوەكانی خولی دووەم، ئێستا دەوامەكە كراوەتە یەكشەممە و پێنجشەممە."
ئاماژەی بەوەش دا: "لەم دوو رۆژەی هەفتەدا بەڕێوەبەری قوتابخانە و یاریدەدەرەكانیان و نووسەرەكان لەنێو قوتابخانە دەوامی خۆیان دەكەن."
ئەحمەد گەرمیانی، ئاشكراشی كرد، دەوامی ئەو ستافە بۆ كۆمەڵێك ئەركە، گوتیشی: "دەوامەكەیان بۆ وەرگرتنی قوتابییانی تازە و گواستنەوەی قوتابییان و تۆماركردنی نمرەی ساڵی رابردوو، گواستنەوەی مامۆستایان و دانانی بەشەوانەكان و ئامادەسازی بۆ ساڵی خوێندنە."
سەرۆكی یەكێتیی مامۆستایان ئەوەشی خستە ڕوو، وێرای دەوامكردنیان لە مانگی حەوت و هەشت، بەڵام دەرماڵەی هاتوچۆی بەڕێوەبەری قوتابخانە و یاریدەدەرەكانیان و نووسەرەكان لە لایەن وەزارەتی داراییەوە دەبڕدرێت.
وەڵام بدەوه