گەرمایەکی زۆر بەھێز بەڕێوەیە

شارەزایەکی بواری کەشناسی ئاشکرای کرد کە دوو شەپۆلی دیکەی گەرمای بەهێز و تاقەت پڕوکێنەر عێراق و هەرێمی کوردستان دەگرێتەوە.

هەڤاڵ سەدیق گەڵۆزی، شارەزای بواری کەشناسی بڵاوی کردووەتەوە: "پێشبینی دەکرێت لە کۆتایی ئەم هەفتەیەدا شەپۆلێکی دیکەی گەرمای بەهێز و تاقەت پڕوکێنەر تەواوی ناوچە جیاوازەکانی هەرێمی کوردستان بگرێتەوه بەپلەکانی گەرما 4-7 پلەی سیلیزی بەشێوەیەکی بەرچاو بەرز دەبێتەوە."

روونیشی کردووەتەوە: "لە ناوچەکانی باشووری عێراق لە بەسڕا، ناسڕیە، عەماڕه، نەجەف و کەربەلا پلەکانی گەرما 50 پلەی سیلیزی تۆمار دەکات و دەگاتە نیوەی کوڵان، لە ناوچەکانی باشووری هەرێمی کوردستانیش پلەکانی گەرما نزیک دەبێتەوە لە نێوانی 48 بۆ 49 پلەی سیلیزی."

ئاماژەشی بەوە داوە: "بەهۆی بەرزی تیشکی سەرووی وەنەوشەیی بوونی شێ ڕێژەیی لەهەوادا لەکاتەکانی پێش نیوەڕۆ بۆکاتی عەسر تیشکی خۆر ستوون دەبێت هەست بەگەرمایەکی تاقەت پڕوکێنەر و بێزارکەر دەکرێت باشتر وایە هاووڵاتیان لەم کاتەندا نەچنە دەرەوە بۆ خۆپارێزییان لە کاریگەری تیشکی زیان بەخش کڵاو و چاویلکە و چەتر بەکاربهێنن."

هەروەها ئەو شارەزایەی بواری کەشناسی راشی گەیاندووە: "شەپۆلی یەکەم لە ڕۆژی چوارشەممەوە 14/8/2024 دەستپێدەکات و تاوەکوو 17/8/2024 بەردەوام دەبێت، شەپۆلی دووەمیش لە 20/8/2024 دەستپێدەکات تاوەکوو 23/8/2024 بەردەوام دەبێت و پلەکانی گەرما لە ناوچەکانی باشووری عێراق 52 پلەی سیلیزی تێپە ڕدەکات."

ئەوەشی خستووەتە روو: "کاریگەری هەردوو شەپۆلەکە لەسەر هەرێمی کوردستان بە پلەیەک لەسەر ناوچەکانی گەرمیان، کەرکووک، سلێمانی و هەڵەبجە هەیە و دواتر لە ناوچەکانی دیکەی هەرێمی کوردستان."