بەرپرسێکی حكوومه‌تی هه‌رێمی کوردستان رایدەگەیەنێت، بۆ تۆمارکردنی فەرمانبەران لە سیستەمی بایۆمەتری و ئامادەکردنی لیستی مووچە بەپێی بایۆمەتری، چەند بڕیارێک دەرچووە، دەشڵێت: "پێویستە هەموو مووچەخۆرێک بایۆمەتری بکات."
د. عه‌بدولحه‌كیم خه‌سرۆ، سه‌رۆكی فه‌رمانگه‌ی هه‌ماهه‌نگی و بەدواداچوون، لە حكوومه‌تی هه‌رێمی کوردستان راگەیاند: "پڕۆسەی بایۆمەتری بەردەوام بووە و پێویستە هەموو موچەخۆرێک بایۆمەتری بکات، بڕیارێک دەرچووە، کە لەو مانگەدا خێراتر بکرێت."
ئاماژەی بەوەش دا، بڕیار دراوە پڕۆسەی تۆمارکردنی بایۆمەتری تەواو بکرێت، گوتیشی: "فەرمانگەی تەکنەلۆجیای زانیاری راسپێردراوە، بەپێی تیمەکانی تۆمار لە شار و شارۆچەکان، لە ماوەیەکی کورتدا ئەم پرۆسەیە تەواو بکەن."
عه‌بدولحه‌كیم خه‌سرۆ ڕوونی کردەوە، زۆربەی فەرمانبەران و مووچەخۆران بایۆمەترییان کردووە ئەوەی ماوە تەواو دەکرێت، گوتیشی: "بڕیاریش دراوە هەر مووچەخۆرێک تۆمار نەکرابێت و گرفتی یاسایی نەبێت، ئاسانکاریی بۆ بکرێت بۆ تۆمارکردنی."
ئەو بەرپرسەی حکوومەتی هەرێمی کوردستان، ئەوەشی خستە ڕوو: "لێژنەی باڵای بایۆمەتری هەموو وەزارەت و دامەزراوە و دەستە و فەرمانگەکان و یەکە ژمێریارییەکانی راسپارد، کە هەماهەنگیی زیاتریان هەبێت، بۆ ئەوەی پرۆسەی لیستی مووچە خێراتر و بێ کەموکوڕی ئامادە بکرێت و میلاک و لیستی مووچەی مووچەخۆرانییش بە پشتبەستن بە تۆماری بایۆمەتری ئامادە بکرێت و گرفتەکان چارەسەر بکرێن."
پێشتر ڕۆژی 29ی7ی 2024، سەرچاوەیەكی ئاگادار لە وەزارەتی دارایی هەرێمی كوردستان، راگەیاند: "ڕۆژی 28ی7ی2024، لەلایەن وەزارەتی داراییەوە، سەرجەم وەزارەت و فەرمانگەكان ئاگادار كرانەوە، بۆ لیستی مووچەی مانگی هەشت دەبێت گشت فەرمانبەران بایۆمەترییان هەبێت و لە لیستی مووچە UPN بنووسرێت و كۆدی دووبارە لە لیستی مووچەدا بەكار نەهێنن، چونكە ئەو دووبارەكردنەوەیە لای وەزارەتی دارایی عێراق بەدیار دەكەوێت و ئەوان، واتا دارایی عێراق ئاگاداریان كردووینەتەوە، هەر كەسێك بایۆمەتریی نەبێت، یان كۆدی بایۆمەترییەكەی دووبارە بێت، یاخود ناوی دووبارە بێـت و هەر هەڵەیەك هەبێت، ئەوا مووچەی خەرج ناكرێت."
وەڵام بدەوه