ئەم کەسانە هیچ جۆرە باجێک نادەن

حکومەتی هەرێمی کوردستان ڕایدەگەیەنێت، هیچ جۆرە باجێک لەو پیشەوەرانە وەرناگیرێت کە یەک سەرچاوەی داهاتی سنوورداریان هەیە.

ڕۆژی 23-7-2024، بە فەرمانی سەرۆکوەزیران بارزانی، چوار جۆر باج لە هەرێمی کوردستان هەڵگیران، ئەوانیش باجی سەر چێشتخانە و هۆتێلەکان، نەخۆشخانە تایبەتەکان، سەمونخانە و نانەواخانەکان و زەوییە بەتاڵەکان.

فەرمانگەی میدیا و زانیاریی حکومەتی هەرێمی کوردستان بڵاوی کردەوە: ئەو پیشەوەرانەی یەک سەرچاوەی داهاتی سنوورداریان هەیە، هیچ جۆرە باجێک نادەن، وەک: سەرتاشخانە، نانەواخانە، شوێنی چاککردنەوەی مۆبایل، شوێنی فرۆشتنی پەلەوەر و هاوشێوەکانیان.

پێشەوا هەورامانی، گوتەبێژیی حکومەتی هەرێمی کوردستان ڕایگەیاند: چوار باجەکە تاوەکو یەکلاکردنەوەی ڕێکخستنەوەی ڕێکارەکانی وەرگرتنی باج لەگەڵ دامودەزگاکانی حکومەتی عێراق و هەموارکردنەوەی یاسای باج ڕادەگیرێن.