حكوومەتی هەرێمی كوردستان جەخت دەكاتەوە، بەشێكی فەرمانبەران تاوەكوو پێنج ساڵ خزمەتیان تەواو نەبێت، هیچ مۆڵەتێكیان پێ نادرێت و بەرپرسێكیش روونكردنەوەی لەبارەوە دەدات.
بەپێی نووسراوێكی سەرۆكایەتیی دیوانی ئەنجوومەنی وەزیرانی كوردستان، بۆ گشت وەزارەت و فەرمانگەكان نێردراوە، تیایدا جەخت لەسەر بڕیارێك سەبارەت بەو فەرمانبەرانە كراوە، كە تواناسازییان تەواو كردووە.
ئاماژە بەوە كراوە، كە جەخت دەكەنەوە: "هەر دەرچوویەكی بەرنامە تواناسازی پێویستە دوای دەستبەكاربوونی، لانیكەم پێنج ساڵ خزمەت بە دامودەزاگاكانیان بكات و نابێت داوای هیچ مۆڵەتێك بكات."
ئەوەشی خستووەتە ڕوو: "نابێت هیچ مۆڵەتێكیان پێ بدرێت، یاخود خواستن (اعارە) بكرێن، تاوەكوو ماوەی پێنج ساڵەكەیان تەواو دەبێت."
لە حاڵێكدا پێچەوانەی ئەوە بكرێت، ئەنجوومەنی وەزیران دووپاتی كردووەتەوە: " وەزارەتەكان بەرپرس دەبن."
زیاتر لە چوار هەزار فەرمانبەر لە ڕێگەی بەرنامەی تواناسازی بۆ بەدەستهێنانی بڕوانامەی ماستەر و دکتۆرا لەلایەن حکوومەتەوە نێردران بۆ زانکۆکانی ئەمریکا و ئەورووپا، کە خەرجییەکانیان لەسەر حکوومەت بووە.
عەباس ئەكرەم، گوتەبێژی وەزارەتی خوێندنی باڵا و توێژینەوەی زانستیی هەرێمی كوردستان، ڕاگەیاند: "هەر فەرمانبەرێک، کە له تواناسازی سەرکەوتوو دەبێ، دەبێ پاکتاوی دارایی و هەمواری بڕوانامەی بۆ بکرێت، پاشان دەبێت پێنج ساڵ خزمەتی بێ پچڕان بکات و مۆڵەتی بێ مووچە و مۆڵەتی خوێندنی پێ نەدرێ، چونکە ئەوە گرێبەست و ڕێنوێنیە و دەبێ جێبەجێ بکرێ."
ئاماژەی بەوەش دا: "ئەو فەرمانەرانە تەنیا لە وەزارەتی خوێندنی باڵا نین، بەڵكوو لە بەشێكی زۆری وەزارەتەكانن و دەبێت پابەند بكرێن بەو پرسە و تاوەكوو پێنج ساڵ خزمەت لە فەرمانگەی خۆیان تەواو دەكەن، نابێت هیچ مۆڵەتێكیان پێ بدرێت و نابێت هیچ گواستنەوەیەكیان بۆ بكرێت."
وەڵام بدەوه