ئەنجوومەنی وەزیرانی هەرێمی کوردستان داوا لە سەرجەم وەزارەت و دەستەکانت دەکات بەزووترین کات فۆرمی دابەشکردنی زەوییان بۆ بنێرن.
دوای 18 ساڵ پڕۆسەی دابەشکردنی زەوی دەستی پێکردووەتەوە و نزیکەی 200 هەزار فەرمانبەر دەگرێتەوە، نزیکەی سێ مانگیشە دابەشکردنی فۆرم بەسەر وەزارەت و فەرمانگەکان دەستیپێکردووە.
سەربەست مەولود، بەڕێوەبەری گشتیی کاروباری یاسایی لە وەزارەتی شارەوانی راگەیاند: "ئەنجوومەنی وەزیران سەرجەم وەزارەت، فەرمانگە و دەستەکانی ئاگادارکردووەتەوە بەزووترین کات فۆرمی زانیاری بۆ وەرگرتنی زەوی و بەڵێننامە هاوپێچی لیستی فەرمانبەران بکرێت و بۆ ئەنجوومەنی وەزیران بنێردرێت." بەڕێوەبەرایەتیی گشتیی تەندروستی هەولێر ئەمڕۆ ئاگادارییەکی بڵاوکردەوە و داوای لە فەرمانگەکانی کرد لە ماوەی یەک هەفتەدا لیست و فۆرمی فەرمانبەران کە مەرجەکانی وەرگرتنی زەوی دەیانگرێتەوە بۆیان ڕەوانە بکەن. هەر فەرمانبەرێک یان خانەنشینێک بە درێژایی ڕاژەکەی زەوی وەرنەگرتبێت سوودمەند دەبێت، بەپێچەوانەوە ئەگەر فۆرم پڕبکاتەوە و زەوی پێبدرێت، لە ئەگەری ئاشکرابوونی سزا دەدرێت بە زیندانیکردن کە لە شەش مانگ کەمتر نەبێت و لە دووساڵ زیاتر نەبێت، هەروەها سزای دارایی سێ ملیۆن دینار دەدرێت، ئەو زەویەشی وەریگرتووە لێ دەسەنرێتەوە.
وەڵام بدەوه