ئاسایشی هەولێر بکوژی گەنجەکەی بنەسڵاوەی دەستگیرکرد

سەرلەبەیانی دوێنێ تەرمی گەنجێک بە ناوی عەلی سەباح لە سنووری دەشتی هەولێر دۆزرایەوە و ئەمڕۆش بەڕێوەبەرایەتیی ئاسایشی هەولێر دەستگیرکردنی سێ کەسی راگەیاند.
 
بەڕێوەبەرایەتیی ئاسایشی هەولێر راگەیێندراوێکدا باسی لە دەستگیرکردنی دوو تۆمەتبار کرد و رایگەیاند: "شەوی رابردوو دوو تاوانباران دەستنیشان کران کە دانیشتووی بنەسڵاوەن و لێکۆلێنەوە لێیان دەستی پێکردووە"
 
لە بەشێکی دیکەی راگەیێندراوەکەدا باسی تۆمەتبارەکان دەکات و تێیدا هاتووە: بکوژەکە ناوی (ع.اع) و هەریەک لە (ش.ە.ج) و(ب.ع.ا)ـیش هاوکارییان کردووە ئێستا دەستگیرکراون و دانیان بە تاوانەکەیاندا ناوە.
 
لەبارەی هۆکاری رووداوەکە ئاسایشی هەولێر ئاماژەی بەوە کردووە، تاوانەکە بەهۆی کێشەی کۆمەڵایەتی بووە.
 
دوێنێ کاژێر 10:00 بۆ 10:30 خولەکی بەیانی دوو منداڵ تەرمێکیان لەنێو سندووقی ئۆتۆمبێلێک دۆزییەوە، هۆگر عەزیز، گوتەبێژی پۆلیسی هەولێر لەبارەی رووداوەکە بە تۆڕی میدیایی رووداوی راگەیاند، ئەو کەسەی کوژراوە ناوی عەلی سەباح سوارە و تەمەنی 29 ساڵانە.