نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازیی هەرێمی کوردستان، راگەیاند: "پلانمان داناوە بۆ پێش جەژن لێژنەكانی چاودێریی بازاڕ فراوان بكەین، بۆ ئەوەی لەم چەند رۆژە و لە رۆژانی جەژنیشدا لەنێو بازاڕ و شوێنەكاندا بەدواداچوون بۆ نرخی كاڵا و كەلوپەل و خۆراكەكان بكەن."
ئاماژەی بەوەش دا، لێژنەكانی چاودێریی بازاڕ لە شار و شارۆچكەكان كارا دەكرێن، گوتیشی: "لێژنەكان چاودێریی نرخ و كوالێتی و پاكوخاوێنی دەكەن، جگە لە لێژنەكانی خۆمان، لە لێژنەكانی قایمقامیەت و ئاسایشیش ئەنداممان دەبێـت."
نەوزاد شێخ کامیل جەختی كردەوە، لێژنەكانیان رێگری لە بەرزبوونەوەی نرخ و ساغكرنەوەی كاڵای خراپ و خۆراكی ماوە بەسەرچوودا دەكەن.
ئەو بەرپرسەی وەزارەتی بازرگانی، هاووڵاتییانی دڵنیا كردەوە، كە بەچڕی چاودێریی بازاڕ دەكەن و داواشی لە هاووڵاتییان كرد، هاوكاریی تیمەكانیان بكەن، بۆ ئەوەی نرخی كاڵاكان بەرز نەكرێتەوە و كاڵا و خۆراكی خراپ بەبۆنەی جەژن ساغ نەكرێتەوە. گوتیشی: "هەر شوێنێك سەرپێچی بكات و نرخ بەرز بكاتەوە، ئەوا رێكاری یاسایی و ئیداریی لە دژی سەرپێچیكاران دەگیرێتە بەر و سزای دارایی دەدرێن."
وەڵام بدەوه