سەرۆکی ئەرکان پێشوازی لە بەرپرسی تیمی ئاسایشی سوپای ئەمریکا لە هەرێمی کوردستان کرد

ئەمڕۆ ٦ی تەموزی ٢٠٢٢، فەریق روکن عیسا عوزێر سەرۆکی ئەرکانی وەزارەتی پێشمەرگە، بە ئامادەبوونی بەڕێوەبەری پەیوەندییەکان و هەماهەنگی وەزارەت، پێشوازی لە کۆڵۆنێڵ سان بۆرن بەرپرسی تیمی ئاسایشی ئەمریکا لە هەرێمی کوردستان و شاندی یاوەری کرد.
لەکۆبوونەوەکەدا، کۆڵۆنێڵ سان بۆرن پیرۆزبایی دەست بەکاربوونی لە سەرۆکی ئەرکان کرد، هیوای سەرکەوتنی بۆ خواست و ئامادەیی خۆشی دەربڕی بۆ هەموو هاوکاری و هەماهەنگییەکی پێویست.
هەر لەو کۆبوونەوەیەدا، کۆڵۆنێڵ سان بۆڕن کورتەیەکی لەبارەی سەنتەری ئۆپەراسیۆنی هاوبەش و چۆنیەتی کاروبار و ئەرکەکانی ئەو سەنتەرە پێشکەش کرد.
هەروەها بە بایەخەوە باسی لە پڕۆژەکانی چاکسازی وەزارەتی پێشمەرگە کرد و رایگەیاند: کە ئەوان بەردەوام هاوکاری ئەو پڕۆژانە دەکەن و لە بواری راوێژکاریشدا، ئەزمونی پیشەییانەی خۆیان لەم باوارەدا دەگەیەنن.
لەکۆتاییدا، باسیان لە چۆنیەتی گەیاندن و دابەش کردنی هاوکارییە سەربازییەکان کرد، لە بوارەکانی مەشق و لۆجستییەوە، سەرۆکی ئەرکان دووپاتی کردەوە، کە هێزەکانی پێشمەرگە، لەڕێگای مەشق و راهێنانە بەردەوامەکانەوە، ئاست و توانا سەربازییەکانیان بەرز دەکرێتەوە و بۆ ئەم مەبەستەش سەرۆکایەتی ئەرکان لەسەر بنەمای تیۆرە سەربازییە مەشقییە نوێیەکان، نەخشە رێگای نوێ دادەڕێژێت بە هاوکاری شارەزایانی بواری مەشقیی هێزەکانی هاوپەیمانان.