ئەمڕۆ شاندێكی پەرلەمانی عێراق بە سەرۆكایەتيی "شاخەوان عەبدوڵا" جێگری سەرۆكی پەرلەمانی عێراق، سەردانی گوندی پەلكانەی كرد و دوای سەردانەكە كێشەی گوندەكە چارەسەر كرا و عەرەبە هاوردەكان خێوەتەكانیان هەڵگرت، بڕیارە لە سبەیشەوە جووتیارانی كورد دەست بە دروێنەی بەروبوومەكانیان بكەن.
ئەمشەو چوارشەم، فەرهاد سمایل خەلیفە، دانیشتووی پەلكانە راگەیاند، ئێوارەی ئەمڕۆ تەواوی خێوەتی عەرەبە هاوردەكان لە پەلكانە لادران و فەرمانمان بۆ هاتووە دەست بە دروێنە بكەین.
لای خۆشیەوە، جووتیارێكی سنوورەكە بە ناوی "محەمەد" كە نوێنەری جووتیارانی سەرگەڕانە وتی، كێشەی جووتیارەكانی ناوچەكە چارەسەر كراوە و فەرمانیش بۆ سوپای عێراق هاتووە كە رێگری نەكرێت لە دروێنەی جووتیاران و لە سبەیەوە تەواوی جووتیاران دەست دەكەن بە دروێنەی بەروبوومەكانیان.
عەرەبە هاوردەكان چەند ساڵێكە و بە دیاریكراوی لە دوای 16ی ئۆكتۆبەرەوە كە دەسەڵاتی پێشمەرگە لە سنوورەكەدا نەماوە، ساڵانە لە هەردوو وەرزی پێگەیشتنی بەروبوومی كشتوكاڵی و گەنم و جۆ دا بە یارمەتيی سوپای عێراق دێنە سەر گوندە كوردییەكان و لە بەرانبەریشدا كوردەكان رووبەڕوویان دەبنەوە بەشێوەیەكی مەدەنی.
وەڵام بدەوه