باران بارین دەسپێدەکات

باران بارین لە ھەرێمی کوردستان دەسپێدەکات، ئەمڕۆ یەكشەممە 17/3/2024، فەرمانگەی میدیا و زانیاریی حكوومەتی هەرێمی كوردستان، هۆشدارییەكی بەپێی پێشبینییەکانی بەشی پێشبینیی وەزارەتی گواستنەوە و گەیاندنی بۆ هاووڵاتییان بڵاو كردووەتەوە، تێیدا ئاماژە بەوە دراوە، ‏‎ڕۆژى دووشەممە 18/3/2024، نمەباران لە کاتە جیاجیاکان لە هەندێك ناوچە دەبارێت، زۆربەى کاتەکان ئاسمان هەورى تەواو دەبێت و پلەى گەرما بە نزیکەى 1 تا 3 پلە نزم دەبێتەوە، سنوورى پارێزگاى دهۆک بارانى زیاتر دەبێت، بە تایبەت لە کاتەکانى شەودا.‏‎

ئەوەش خراوەتە ڕوو، ڕۆژى سێشەممە 19/3/2024، دواى زیادبوون و بەهێزبوونى کاریگەریی ئەم شەپۆلەی ڕوو لە ناوچەکەمان دەکات، بارانبارین بەشێوەى مامناوەند و لێزمە و هەورەتریشقە سەرجەم هەرێمی کوردستان دەگرێتەوە.‏‎

بڕى بارانبارینى پێشبینیکراو لەگەڵ کاتى دابارین بە جیاوازىی ناوچەکەمان بەم شێوەیە دەبێت:‏‎

‏‎- سەنتەرى شارى دهک سەرووى 60 ملم

‏‎- ناوچە شاخاوییەکان بە تایبەت ناوچە سنووریەکان (ئاکرێ، شیلادزێ، چەمانکێ، ئامێدى) سەرووى 70 ملم.

‏‎- ئیدارەى سەربەخۆى زاخۆ لە نێوان 45 - 60 ملم دەبێت.

‏‎- دواى درێژبوونەوەى کاریگەریی ئەم شەپۆلە بۆ سەرجەم ناوچە جیاجیاکانى هەرێمی كوردستان، بڕى دابارین بۆ رۆژى سێشەممە لە ناوچەکانى تر بەم شێوەیە دەبێت:‎

سنوورى پارێزگاى هەولێر: سەنتەرى شار زیاتر لە 40 ملم دەبێت، ناوچە شاخاوییەکانى سنوورى پارێزگاى هەولێر لە سەرووى 60 ملم دەبێت.

‏‎- لە ئیدارەى سەربەخۆى سۆران بڕى بارانى پێشبینیکراو لە سەرووى 60  ملم دەبێت.

‏‎- سنوورى پارێزگاى سلێمانى و ئیدارەى گەرمیان و بەشێک لە پارێزگاى هەڵەبجە زۆربەى کات لە کاتەکانى دواى نیوەڕۆ و ئێوارە بارانبارینى بە لێزمەى دەبێت و بارانى پێشبینیکراوى لە ماوەى کاریگەریی ئەم شەپۆلە بەم شێوەیە دەبێت:

‏‎سنوورى پارێزگاى سلێمانى و ناوچە شاخاوییەکانى 45 - 75 ملم دەبێت.

‏‎ئیدارەى سەربەخۆى گەرمیان لە 35 - 45 ملم دەبێت.

‏‎پارێزگاى هەڵەبجە و ناوچە شاخاوییەکانى 25 - 35 ملم دەبێت.

‏‎- ئیدارەى سەربەخۆى ڕاپەڕین، بە درێژایی ماوەى دەستپێکى شەپۆلەکە بارانبارین دەبێت و بڕى بارانى پێشبینیکراو بۆ ئەم سنوورە لە نێوان 65 - 85 ملم دەبێت.‏‎

ئەوەش خراوەتە ڕوو، ئەگەرى تەزرەبارین و هەورەتریشقە هەیە لە کاتە جیاجیاکان و هەندێ ناوچەدا، لەگەڵ زیادبوونى خێرایی با بۆ سەرووى 25 کیلۆمەتر لە کاتژمێرێکدا، ‏‎کاریگەریی ئەم شەپۆلە لە ڕۆژى چوارشەممە لاواز دەبێت و لە کاتەکانى پاشنیوەڕۆى هەمان ڕۆژ کۆتاىی دێت.