خۆ جیاکردنەوە و خۆ چەماندن دادمان نادات لای دوژمنی نەتەوەیی و ھاوبەشمان، ئەوان بەبێ جیاوازی فکر و ڕەنگ و ناوچە ھەوڵی لەناوبردنی ھەمومان دەدەن، بۆیە پێویستە لەسەر ئێمەش ھەمومان بە یەکگرتوویی بەرگریکار بین لە پرس و بەرژەوەندیە گشتی و نەتەوەیی و نیشتمانیەکانمان.
پەلاماردانی غازی کۆرمۆر، راگرتنی نەوتی ھەرێم، ئاستەنگ دروستکردن بۆ بەشە بودجەی ھەرێم، پەلاماردانی فرۆکەخانەی ھەولێر و وەبەرھێن و سەرمایەدارانمان لە یەک عەقڵێت و ئاراستەوە سەرچاوەی گرتووە بۆ لەناوبردنی ئابوریمان و سیاسەتی برسی کردنمانە وەکو ڕێگایەکی نوێی درێژکراوەی ھەمان سیاسەتی ئەنفالکردن، کیمیابارانکردن، لە سێدارەدانی گەنجانمان لە ڕۆژھەڵاتی کوردستان و ھەوڵی تێکدانی فکری نەتەوەیی و نیشتمانیمان بۆئەوەی کیان و ناسنامەی کوردبوونمان لەناوبەرن.
ڕاستە حکومەتی نوێی عێراق و زۆربەی لایەنە عێراقیەکان بەشێک نین لەو سیاسەتە شەڕانگێزیە دژی کورد و ھەرێمی کوردستان، بەڵام دەسەڵاتی کۆنترۆڵکردنی ئەو عەقڵێتە زاڵ و شۆڤێنیەی ناو عێراق و دەستی دەرەکی و ڕێگری لە سیاسەتی درێژکراوەی دژ بە کوردیشیان نیە، بۆیە پێویستە سەرکردایەتی کورد خۆی بیر لە ڕێگاچارە و بەرپەرچدانەوەی ئەو پیلانگێڕی و ھێرشانە بکاتەوە کە میللیشیا لە یاسا دەرچووەکان جێبەجێ کاری پەلاماردانەکانن و زۆر بە ئاسانی دەست دەگات پێیان.
عەبدوڵای کوێخا موبارەک
وەڵام بدەوه