دوای ئەوەی دوێنێ دووشەم وەزارەتی گەنجینەی ئەمەریكا كۆمپانیای "فلای بەغداد" و بەڕێوەبەرە جێبەجێكارەكەی خستە ناو لیستی سزاكانییەوە، ئەمڕۆ بانكی ناوەندیی عێراق دەستی بە بلۆككردنی حیساباتی كۆمپانیاكە لە سێ بانكی سەرەكی كرد، ئەوەش وەك وەڵامدانەوەیەك بۆ سزاكانی وەزارەتی گەنجینەی ئەمەریكا.
لای خۆیەوە كۆمپانیای "فلای بەغداد"، رای گەیاند كە بەهۆی سزاكانی ئەمەریكاوە، ژمارەیەك گەشتی بۆ چەند وڵاتێك هەڵوەشاندووەتەوە، لەوانە بۆ دوبەی و بەیرووت و ئیستەنبووڵ، كۆمپانیاكە لە بەیاننامەیەك رای گەیاند كە وەستانی ئەو گەشتانەی بۆ ماوەی سێ رۆژە، واتە ئەمڕۆ و سبەی و پێنجشەمی داهاتوو، گەشتەكانیش بریتین لە (بەغدا ئیستەنبووڵ بەغدا)، (بەغدا سەبیحە بەغدا)، (هەولێر ئیستەنبووڵ هەولێر)، (بەغدا بەیرووت بەغدا)، (بەغدا دوبەی بەغدا).
دوێنێ وەزارەتی گەنجینەی ئەمەریكا كۆمپانیای "فلای بەغداد" و بەڕێوەبەری جێبەجێكاری كۆمپانیاكەی خستە ناو لیستی سزاكانیەوە، ئەوەش بەهۆی پاڵپشتییان لە چالاكییەكانی فەیلەقی قودسی ئێران و میلیشیا شیعەكان، كە هێرش دەكەنە سەر بنكە سەربازییەكانی ئەمەریكا لە عێراق و سووریا، واشنتن كۆمپانیاكەی بە گواستنەوەی چەكداری میلیشیاكان و مووشەك و چەك تەقەمەنی لە عێراقەوە بۆ سووریا تۆمەتبار كرد.
وەڵام بدەوه