لیوا عەبدولخالق تەڵعەت : هێزی پێشمەرگە توانای پارێزگارییان لە هەرێمی كوردستان هەیە

نوێنەری حکوومەتی هەرێمی کوردستان لە فەرماندەیی ئۆپەراسیۆنە هاوبەشەکانی عێراق، رایدەگەیەنێت، بەرپرسیارێتی لە ئەستۆی حكوومەتی عێراق و هاوپەیماناندایە رێگری لە هێرشی میلیشیاكان بۆ سەر هەرێمی كوردستان بكەن. جەخت لەوەش دەكاتەوە، بەردەوامیی ئەو هێرشانە كاریگەریی خراپ لەسەر پەیوەندییەكانی نێوان هەولێر و بەغدا دادەنێت.
لیوا عەبدولخالق تەڵعەت، نوێنەری حکوومەتی هەرێمی کوردستان لە فەرماندەیی ئۆپەراسیۆنە هاوبەشەکانی عێراق، ڕایگەیاند، نەخشەی ئەو هێرشانەی دەكرێنە سەر هەرێمی كوردستان دیارن و ئەو هێزانەی هێرش دەكەن، لە لای حكوومەتی هەرێمی كوردستان و عێراق ناسراون، گوتیشی: ”هەرێمی كوردستان بە هیچ شێوەیەك لە هاوكێشەی شەڕی نێوان ئەو میلیشیایانەی عێراق لەگەڵ ئەمریكادا نییە، لەبەرئەوە ئەركی حكوومەتی عێراق و هەروەها هاوپەیمانانە، كە رێگری لەو هێرش و كردەوە تیرۆرستییانە بكەن، كە ماوە ماوە لەلایەن ئەو گرووپە میلیشیایانەوە دەكرێنە سەر هەرێمی كوردستان.“
لیوا عەبدولخالق تەڵعەت، ئاماژەی بەوەش دا، هەڵوێستی حكوومەتی عێراق لە بەرامبەر بەو هێرشانە ئەرێنییە و لە دژیانە، بەڵام وا دیارە تاوەكوو ئێستا نەیتوانیوە رێگرییان لێ بكات، گوتیشی: ”ئەو گرووپانە ناتوانن سەقامگیریی هەرێمی كوردستان تێكبدەن، چونكە حكوومەتی هەرێمی كوردستان و هێزی پێشمەرگە توانای پارێزگارییان لە هەرێمی كوردستان هەیە، بەڵام ئەو كردەوانە دەچنە خانەی كاری تیرۆرستییەوە و ئەركی هەموو لایەكە بە هاوبەشی رووبەڕووی تیرۆر ببینەوە.“
لیوا عەبدولخالق تەڵعەت، جەختی لەوەش كردەوە، كە بەردەوامیی ئەو هێرشانە كاریگەریی خراپی لەسەر پەیوەندییەكانی هەولێر و بەغدا دەبێت و پێویستە حكوومەتی عێراق پەلە بكات لە كۆنتڕۆڵكردنیان