بەم نزیکانە دەست بە ناو نوسینی کرێچیان دەکرێت، بیست ھەزار خێزان لێ سوودمەند دەبن

سەرۆكی دەستەی وەبەرهێنان زانیاریی نوێ لەبارەی دروستكردنی 20 هەزار شوقە بۆ كرێچی و كەمدەرامەتەكان ئاشكرا دەكات و رایگەیاند، ناونووسین لە رێگەی پارێزگا و ئیدارە سەربەخۆكان دەبێت.
د. محەمەد شوکری، سەرۆکی دەستەی وەبەرهێنانی هەرێمی کوردستان، راگەیاند: "ئەو یەكە نیشتەجێبوونانەی، كە لە قۆناغی یەکەمدا 20 هەزار یەکە دەبێت بۆ کەمدەرامەت و کرێنشینان، بەم نزیكانە پڕۆسەی ناونووسینی كرێچییه‌كان لە پارێزگا و ئیدارە سەربەخۆكان دەست پێدەكات و میكانیزمەكەی رادەگەیەندرێت".
ئەو 20 هەزار شوقەیە بە فەرمانی سەرۆكی حكوومەتی هەرێمی كوردستان دەبێت و لە هەشت شوێنی سەرەکیدا دەبن، کە چوار پارێزگا و چوار یەکەی سەربەخۆن و بە شێوەی یەکسان دابەش دەکرێت.
محەمەد شوکری ئەوەشی خستە ڕوو: "پێشەكیی پێدانی شوقەكان زۆر كەم دەبێت و قیستەكانیش كەم و ماوە درێژ دەبن و لە چەند رۆژی داهاتووشدا بڕی پێشەكی و پارەی قیستەكان یەكلایی دەكرێتەوە".
جەختی كردەوە، لە ماوەی چەند رۆژی داهاتوودا، وەك دەستەی وەبەرهێنان دەرخستەی پڕۆژەکە و شێوازی جێبەجێکردنی دیاری دەکەن و بانگهێشتی وەبەرهێنەران دەکەن: "لەگەڵ ئەوەشدا، هەوڵ دەدەین لە زووترین کاتدا ئەو پڕۆژانە جێبەجێ بکەین و هەموو پرۆسەکەش لەژێر چاودێریی حکوومەتی هەرێمی کوردستاندا دەبێت، هەروەها سەرۆکی حکوومەتی هەرێمی کوردستانیش رای سپاردووین هەموو هاوکارییەکیان بکرێت، بۆ ئەوەی ئەو پڕۆژەیە سەرکەوتوو بێت”.
سەرۆکی دەستەی وەبەرهێنانی هەرێمی کوردستان گوتیشی: "دروستکردنی یەكەكان بەپێی ڕێژەی نیشتەجێبوون دەبێت و بۆ ئەو کەمدەرامەتانە دەبێت، کە توانای دابینکردنی یەکەی نیشتەجێبوونیان نییە، هەرچی لە توانای حكوومەتیشدا بێت بۆ بارسووكیی ئەو كرێچییانە، دەیكات".