سەرۆکی ئەرکان پێشوازی لە راوێژکاری باڵای هێزەکانی هاوپەیمانان کرد

راگەیاندنی وەزارەتی پێشمەرگە 
بەبۆنەی کۆتایی هاتنی ئەرکەکەی، وەک راوێژکاری باڵای هێزەکانی هاپەیمانان لەهەرێمی کوردستان، ئەمڕۆ ٨ی ئایاری ٢٠٢٢، فەریق جەمال محەمەد سەرۆکی ئەرکانی وەزارەتی پێشمەرگە، پێشوازی لە کۆڵۆنێڵ تاد بۆرۆس راوێژکاری باڵای هێزەکانی هاوپەیمانان لەهەرێمی کوردستان و شاندێکی یاوەری کرد.
لەدیدارێکدا، کە عەمید روکن محەمەد سەعید بەڕێوەبەری پەیوەندییەکان و هەماهەنگی وەزارەت تێیدا ئامادەبوو، کۆڵۆنێڵ تاد بۆرۆس راوێژکاری باڵای هێزەکانی هاوپەیمانان لەهەرێمی کوردستان رایگەیاند: ئەرکەکەی وەک گەورە راوێژکار لە هێزەکانی هاوپەیمانی نێودەوڵەتی دژی داعش بەمزوانە بەکۆتا دێت، گوتیشی بۆ من جێگای خۆشحاڵی بوو، کە لە نزیکەوە لەگەڵ پێشمەرگە بووم، بەیەکەوە زۆر کاری گرنگ و باشمان ئەنجامدا. 
لای خۆیەوە، سەرۆکی ئەرکان سوپاس وستایشی راوێژکاری باڵای هێزی هاوپەیمانانی کرد، بۆ هەوڵ ماندوبوونە بەردەوامەکانی لەکارکردن لەگەڵ هێزی پێشمەرگەی کوردستان و رایگەیاند: کۆڵۆنێڵ تاد بۆرۆس یاریدەدەرێکی باش و چالاک بوو بۆ سەرکەوتنی کار و پرۆژە هاوبەشەکانی نێوان هەردوولا، هاوکات خۆشحاڵی خۆشی نیشاندا، کە لەماوەی رابردوودا، وەک یەک تیم کاریان لەگەڵ راوێژکاری باڵای هێزی هاوپەیمانان کردووە، هیوای سەرکەوتنی لەئەرک و کاری داهاتوویدا بۆ خواست.
لەکۆتایی دیدارەکەدا، وەک نیشاندانی وەفا و ڕێز و خۆشەویستی هێزی پێشمەرگەی کوردستان بۆ کۆڵۆنێڵ تاد بۆرۆس لەبەرامبەر کار و خزمەتەکانی بۆ هێزی پێشمەرگەی کوردستان، دیاری ڕێز لێنانی لەلایەن فەریق جەمال محەمەد سەرۆکی ئەرکانەوە پێبەخشرا.