عەره‌به‌ هاورده‌كان له‌ كه‌ركووك هه‌ڵده‌كوتنه‌ سه‌ر جوتیارانى کورد

ئەمڕۆ پێنجشه‌ممه‌ 7ی 12ی 2023، ژمارەیەک عه‌ره‌بی هاورده‌ و چه‌كدارانی میلیشیاكانی حەشدی شەعبی به‌ چه‌كه‌وه‌ هه‌ڵیانكوتایه‌ سەر زەوییە کشتوکاڵیەکانی گوندی (سنگوری)ی كوردانی سه‌ر به‌ قه‌زای خورماتوو.
به‌پێی زانیارییه‌كان، جوتیاران و دانشتوانی گونده‌كه‌ رووبەڕووی عه‌ره‌به‌ هاورده‌كان و چه‌كدارانی حه‌شدی شه‌عبی بوونه‌وه‌ بۆ رێگەگرتن لە زەوتکردن و کێڵانی زەویەکانیان، دواتر له‌لایه‌ن میلیشیاكانه‌وه‌ ده‌ستڕێژی گولـله‌ كرایه‌ سه‌ر جوتیارانی گونده‌كه‌.
له‌ دوای خیانه‌تی 16ی ئۆكتۆبه‌ری 2017ه‌وه‌ كاتێك میلیشیاكانی حه‌شدی شه‌عبی كه‌ركووك و ناوچه‌ كوردستانییه‌كانی تری ده‌ره‌وه‌ی ئیداره‌ی هه‌رێمی كوردستانیان داگیر كرد له‌و كاته‌وه‌ تا ئێستا پرۆسه‌یه‌كی چڕی ته‌عریب ده‌ستی پێكردووه‌ته‌وه‌ و ناوه‌ ناوه‌ عه‌ره‌به‌ هاورده‌كان به‌ پاڵپشتی هێزه‌ سه‌پێندراوه‌كان له‌ كه‌ركووك و خورماتوو و ناوچه‌ كوردستانییه‌كانی تر هه‌ڵده‌كوتنه‌ سه‌ر گونده‌كانی كوردان به‌ مه‌به‌ستی داگیركردنی زه‌ویوزاری جوتیارانی كورد.