سه‌رۆكى هه‌رێمى كوردستان به‌شدارى له‌ يادى ڕۆژى نيشتمانيى ئيماراتدا کرد

ئێواره‌ى ئه‌مڕۆ شه‌ممه‌ 2023/12/2  نێچيرڤان بارزانى، سه‌رۆكى هه‌رێمى كوردستان له‌ دوبه‌ى، به‌شدارى له‌ ڕێوڕه‌سمى يادى ڕۆژى نيشتمانيى ئيماراتدا كرد.
ڕێوڕه‌سمه‌كه‌ هاوكات له‌گه‌ڵ به‌رده‌واميى كار و چالاكييه‌كانى كۆنفرانسى نه‌ته‌وه‌ يه‌كگرتووه‌كان بۆ گۆڕانى كه‌شوهه‌وا (COP28) به‌ به‌شداريى ميوانان و ئاماده‌بووانى كۆنفرانس، به‌ڕێوه‌چوو.
له‌ ڕێوڕه‌سمه‌كه‌دا سه‌رۆكى هه‌رێمى كوردستان، به‌ ناوى هه‌رێمى كوردستانه‌وه‌، پيرۆزبايى له‌ شێخ محه‌مه‌د بن زايد ئال نه‌هيان، سه‌رۆكى ئيمارات و گه‌له‌كه‌ى كرد و هيواى سه‌ركه‌وتن و پێشكه‌وتنى به‌رده‌وامى بۆ خواستن.
 نێچيرڤان بارزانى پێرێ پێنجشه‌ممه‌ له‌سه‌ر بانگهێشتى فه‌رميى سه‌رۆكى ئيمارات، بۆ به‌شدارى له‌ كۆبوونه‌وه‌ى لووتكه‌ و كردنه‌وه‌ى كۆنفرانسی (COP28)دا گه‌يشته‌ دوبه‌ى و له‌ په‌راوێزى كۆنفرانسه‌كه‌دا چاوى به‌ ژماره‌يه‌ك له‌ سه‌رۆك و شا و سه‌ركرده‌ى وڵاتان كه‌وت.