ڕۆژی چوارشەممە22ی تشرینی دووەمی2023، سەفین دزەیی، بەرپرسى فەرمانگەی پەیوەندییەکانى دەرەوەى حکومەتی هەرێمی کوردستان کۆبوونەوەیەکى لەگەڵ ژمارەیەک لە نوێنەرانى حکومەتى هەرێم لە دەرەوە ئەنجامدا.
لە کۆبوونەوە بەرپرسى فەرمانگەی پەیوەندییەکانى دەرەوە پوختەیەکى لە سیاسەت و تێڕوانینى حکومەتى هەرێم لەمەڕ پتەوکرنى پەیوەندییەکان لەگەڵ کۆمەڵگاى نێودەوڵەتى خستەڕوو.
سەفین دزەیی، ئاماژەى بەوەدا کە هەوڵەکانى حکومەتى هەرێم بەردەوامە بۆ کردنەوەى چەند نوێنەرایەتییەکى تازە لەچەند وڵاتێک لە پێناو سوود و بەرژەوەندى هەردوولا.
بەرپرسى فەرمانگەی پەیوەندییەکانى دەرەوە سوپاسى نوێنەرانى حکومەتى هەرێمى لەدەرەوە کرد کە لە ئاستى بەرپرسیارییەتى دابوون و لە هەوڵەکانیان بەردەوامن بۆ خستنەڕووى دیدو تێڕوانینی حکومەتى هەرێمى کوردستان لە پێناو پێشخستنى پەیوەندیییەکان لەگەڵ ئەو وڵاتانەى تێیدا نیشتەجێن لە بوارەکانى دیپلۆماسى و ئابوورى و بازرگانى کلتوورو وەبەرهێنان.
لە تەوەرێکى دیکەى کۆبوونەوەکەدا باس لە بایەخى زیاتر بەهێزکردنى نوێنەرایەتییەکان و هاوکارى و هەماهەنگى لەگەڵ دامەزراوە فەرمییەکانى ئەو وڵاتانە کرا کە نوێنەرایەتى لێیە. هاوکات باس لەو ئاستەنگانە کرا کە دێنە بەردەم کارى نوێنەرایەتییەکان و لەم رووەوە سەفین دزەیی پشتگیرى تەواوى فەرمانگەى پەیوەندییەکانى دووپاتکردەوە بۆ زاڵبوون بەسەر ئاستەنگەکان و باشتر بەڕێوەچوونى کارەکان.
وەڵام بدەوه