وەزیری پەروەردە داوا لەو مامۆستا و بەڕێوەبەرانە دەكات دەست بە پرۆسەی خوێندن بكەن كە بایكۆتی پرۆسەی خوێندنیان كردووە و لەوبارەیەوەش دەڵێت: فەرمانێك لەوبارەیەوە دەردەكەین و دەسەڵاتەكان بەكار دێنین.
ڕۆژی پێنجشەممە، 19ـی تشرینی یەكەمی 2023، ئالان حەمەسەعید، وەزیری پەروەردەی حكومەتی هەرێم، لە كۆنگرەیەكی ڕۆژنامەوانیدا ڕایگەیاند: دۆخی خوێندن لەو شوێنانەی بایكۆتیان كردووە، لە مەترسیی گەورەدایە. پێویستە دەست بە دەوامی خوێندن لەو شوێنانە بكرێت، دۆخی بێمووچەیی و گرفتەكان تەنیا كێشەی وەزارەتی پەروەردە نییە، بەڵكوو هەموو بوارەكانی ژیانی گرتووەتەوە، بۆیە پێویستە بچینە ژێر باری بەرپرسیارەتییەوە.
گوتیشی: فەرمانێك دەردەكەین، بە پێی ئەو فەرمانە، لە ڕۆژی یەكشەممەی داهاتوو، 22ی تشرینی یەكەمی 2023، دەبێت مامۆستایان و بەڕێوەبەرانی خوێندن، لە سنوورەكانی سلێمانی و ڕاپەڕین و هەڵەبجە دەست بە دەوام بكەنەوە، و تەواوی دەسەڵاتی كارگێڕی دەدەینە بەڕێوەبەرە گشتییەكانی پەروەردەی سلێمانی و هەڵەبجە و ئیدارەی ڕاپەڕین و گەرمیان، تاكوو لە هەفتەی داهاتوو خوێندن دەست پێ بكاتەوە.
ئەوەشی زیاد كرد: ئەم بڕیارە بە مانای پشتتێكردن لە مامۆستایان نییە، خەمخۆری مامۆستایانین تا مافەكانیان بەدی بێنین، بەڵام دوو مووچە و سێ مووچە لە بەغداوە نەهاتووە و دابەش نەكرابێت؛ ئەوەی كە هاتووە دابەش كراوە، دواكەوتنی مووچە بۆ هەموو هەرێمی كوردستانە نەك تەنیا بۆ وەزارەتی پەروەردە. بۆیە پێویستە هەموومان ئەو تێگەیشتنەمان هەبێت كە دۆخەكە گشتییە و نابێت خوێندنی قوتابیان بفەوتێت.
پێنج هەفتە بەسەر دەستپێكی ساڵی نوێی خوێندنی 2023-2024دا تێپەڕیوە و لە بەشێكی قوتابخانەكانی سنووری سلێمانی و هەڵەبجە و ئیدارەكانی ڕاپەڕین و گەرمیان خوێندن دەستی پێ نەكردووە، هەفتەی پێشووش ئەو مامۆستا و بەڕێوەبەرانەی بە بەرپرسیارەتییەوە لە بەشێك لە قوتابخانەكان دەستیان بە خوێندن كردەوە، لەلایەن چەند گرووپێكی نادیارەوە هەڕەشەیان لێ كرا.
وەڵام بدەوه