موقتەدا سەدر بێدەنگی شکاند

موقتەدا سەدر، ڕێبەری ڕەوتی نیشتمانیی شیعە، پەیامێکی ئاراستەی ئەمریکا کرد و تێیدا بە توندی ڕەتیکردەوە عێراق بکرێتە گۆڕەپانی ململانێ سیاسی و ئابوورییەکان. هاوکات جەخت دەکاتەوە کە عێراقییەکان دەیانەوێت لەگەڵ دراوسێکانیان لە ئارامی، ئاسایش و ئاشتیدا بژین.
لە پەیامەکەیدا کە ئەمڕۆ چوارشەممە بڵاویکردووەتەوە، سەدر ڕایدەگەیەنێت کە ئەوان دژی هەر لایەنێکن وڵاتەکەیان داگیر بکات و سەربەخۆیی عێراق لە سەرووی هەموو مامەڵەیەکەوەیە. هەروەها ئاماژەی بەوە کردووە، دەیانەوێت وڵاتەکەیان بە ئازادی و سەربەخۆیی دوور لە دەستوەردانی دەرەکی بونیاد بنێن، جا ئەو دەستوەردانە ڕۆژهەڵاتی، ڕۆژئاوایی، باکووری یان باشووری بێت.
ڕێبەری ڕەوتی نیشتمانیی شیعە هۆشداری دەداتە ئەمریکا و دەڵێت، ئەگەر دەیانەوێت لاپەڕەیەکی نوێ هەڵبدەنەوە، "پێویستە بە دادپەروەری و بێ لووتبەرزی بێت". ، هەروەک راشیگەیاندووە: عێراق ڤەنزوێلا نییە.
ئەوەشیخستووەتەڕووکە ئەوان پابەند نین بە بەرگریکردن لە هیچ لایەنێک و نایانەوێت بە وەکالەت لەبری کەس بجەنگن.
لە پەیامەکەیدا، ڕێبەری ڕەوتی نیشتمانیی شیعە داوا دەکات لاپەڕەیەکی نوێی پەیوەندییەکان بە دادپەروەری و دوور لە لووتبەرزی هەڵبدرێتەوە. هاوکات هیوای خواست گەلی ئەمریکا ببێتە خاوەنی حکومەتێکی ئاشتیخواز کە ڕێز لە وڵاتانی دیکە بگرێت و دوور بێت لە سیاسەتی خۆسەپاندن.