تێچووی دەرهێنانی پاسپۆرت زۆر کەمدەکرێتەوە

پەرلەمانتارانی عێراق واژۆ کۆدەکەنەوە تا ڕسوماتی پاسپۆرتی ئەلیکترۆنی لە 91 هەزارەوە بۆ 10 هەزار دینار کەم بکەنەوە و تەواوی داهاتەکانیش بۆ خەزێنەی دەوڵەت بگەڕێننەوە.
ئێستا تێچووی دەرهێنانی پاسپۆرتی ئەلیکترۆنی 91 هەزار دینارە؛ 66 هەزاری بۆ وەبەرهێنەر و 25 هەزار دیناریشی بۆ خەزێنەی گشتیی عێراق دەڕوات.
 حەیدەر محەممەد موتەیری پەرلەمانتاری عێراق سەرپەرشتیی ئەم دەسپێشخەرییە دەکات و ئاماژە بەوە دەدات، تێچووی چاپی پاسپۆرت تەنیا 10 هەزار دینارە، بۆیە دەیانەوێت لەرێگەی ئەم گوشارەوە ئەو تێچووە زیادە لە سەر شانی هاووڵاتییان بە یەکجاری لابدەن.
 موتەیری پێیوایە وەزارەتی ناوخۆ بەهۆی هەبوونی 720 هەزار فەرمانبەر، دەتوانێت بەبێ وەبەرهێنەری دەرەکی ئەم دۆسیەیە بەڕێوە ببات و ڕێگری لە هەدەردانی سامانی گشتی بگرێت.
 ئەم پەرلەمانتارە داوا دەکات حکومەت گرێبەستی پاسپۆرت هەڵوەشێنێتەوە، چونکە نایانەوێت پارەی خەڵک بۆ بەرژەوەندیی کۆمپانیا تایبەتەکان بەفیڕۆ بدرێت و دەبێت هەموو داهاتەکە بگەڕێتەوە.
 تا ئێستا حکومەت بڕیاری نەداوە، بەڵام زیادبوونی گوشاری پەرلەمانتاران ئەگەری پێداچوونەوە بە تێچووی پاسپۆرتی ئەلیکترۆنی لە داهاتوویەکی نزیکدا لە ناو پەرلەمانی عێراق زیاتر دەکات.