ئەمریکا ڤیتۆی نارد بۆ حکومەتەکەی عێراق

سەرچاوەیەکی بەرپرس ناوەڕۆکی پەیامێکی ئەمریکای بۆ حکومەتی نوێی عێراق ئاشکرا کرد، کە تێیدا واشنتۆن ڤیتۆی خستووەتە سەر بەشداریکردنی شەش گرووپی چەکداری خاوەن باڵی سیاسی لە کابینەی حکومەتەکەی عەلی زەیدی، سەرۆک وەزیرانی عێراق.
کەناڵی حوڕەی ئەمریکی لە زاری سەرچاوەکەوە کە نەیویستووە ناوی ئاشکرا بکرێت، بڵاویکردەوە؛ پەیامەکەی ئەمریکا کە ڤیتۆکەی تێدایە، گەیشتووەتە دەست ژمارەیەک لە سەرکردەکانی چوارچێوەی هەماهەنگی، بەڵام تا ئێستا هیچ ناوێک لەو شەش گرووپە چەکدارە دیاری نەکراوە.
لەبارەی تێڕوانینی واشنتۆن بۆ شێوەی حکومەتی داهاتووی عێراق، وتەبێژێک بەناوی وەزارەتی دەرەوەی ئەمریکا بە کەناڵەکەی ڕاگەیاندووە: "ئەمریکا بە وردی چاودێریی پرۆسەی پێکهێنانی حکومەتی عێراقی کردووە و پێویستە گرووپە چەکدارەکان هیچ ڕۆڵێکیان لە دامەزراوەکانی دەوڵەتدا نەبێت."
سەرەڕای ئەوەی هێزە سیاسییەکانی نزیک لەو گرووپانە خاوەنی نزیکەی ٨٠ کورسیی پەرلەمانین، بەڵام غیابی ئەو گرووپە چەکدارانە لە گۆڕەپانی سیاسیدا بە ڕوونی دەبینرێت. لەلایەکی دیکەشەوە، عەلی زەیدی دوای وەرگرتنی متمانەی پەرلەمان، جەختی لەوە کردەوە کە هەنگاو دەنێن بۆ چەسپاندنی سەقامگیری و بەهێزکردنەوەی شکۆی دەوڵەت.