د.سەباح سوبحی، پەرلەمانتاری پارتی دیموكراتی كوردستان لە لێژنەی نەوت و غازی پەرلەمانی عێراق، ئەمڕۆ دووشەممە (8ی ئەیلوولی 2025)، ل ئاشكرای كرد، سەرجەم ئامادەکارییە تەکنیکی و کارگێڕییەکانی تایبەت بە دەستپێکردنەوەی هەناردەی نەوتی کوردستان تەواو بوون و تەنیا دەرکردنی بڕیارێک لەلایەن ئەنجومەنی وەزیرانی فیدراڵییەوە ماوە بۆ دەستپێکردنی پرۆسەی هەناردەكردنەوەی نەوتی هەرێمی كوردستان بە شێوەیەکی فەرمی.
سوبحی، ئاشكراشی كرد، بەرهەمهێنانی نەوت لە هەرێمی كوردستان لەم دواییانەدا 50 هەزار بەرمیل لە ڕۆژێکدا زیادی کردووە، بەڵام پێویستە ڕێککەوتن لەسەر هەناردەکردنی نەوت سێ لایەنە بێت، لەنێوان حکوومەتی هەرێمی كوردستان و حکوومەتی فیدراڵ لە بەغدا، لەگەڵ کۆمپانیا بیانییە وەبەرهێنەرەکان.
هەروەها گوتیشی: “ئەو هەنگاوانەی تا ئێستا نراون زۆر باشن، بۆرییەکە دوای ماوەیەکی درێژ لە وەستان، ئێستا بەتەواوی ئامادەیە بۆ پرۆسەی دەستپێکردنەوەی هەناردەکردن.”
ئەو ئەندامەی لێژنەی نەوت و غازی پەرلەمانی عێراق، ئاماژەی بەوەش کرد، مادەی 12ی یاسای بودجە بەوردی باسی لە تەرخانکردنی 16 دۆلار بۆ هەر بەرمیلێک کردووە بۆ دابینکردنی تێچووی دەرهێنان و گواستنەوە و هەموو ئامادەكارییەك تەواو كراون، تەنیا ماوە بەغدا بڕیاری هەناردنەكردنەوەی بدات.
وەڵام بدەوه