ماوەیەكە راپۆرتەكان باسی تێوەگلانی فەرمی و نافەرمیی عێراق لە فرۆشتنی بە قاچاغی نەوتی ئێران لە رێگەی تێكەڵكردنی لەگەڵ نەوتی عێراق و فرۆشتنی بە ناوی نەوتی عێراق لە بازاڕەكان دەكرێت و تا ئێستە وەزارەتی گەنجینەی ئەمەریكا دووجار سزای بەو هۆیەوە درەكردووە، ئەمڕۆ سەرۆك وەزیرانی عێراق بڕیاری پێكهێنانی لیژنەیەكی باڵای لێكۆڵینەوەی لەو بابەتە دا.
بەپێی راگەیەندراوێكی كورتی نووسینگەی سەرۆك وەزیرانی عێراق، ئەمڕۆ محەمەد شیاع سوودانی سەرۆك وەزیران رێنوێنیی پێكهێنانی لیژنەیەكی باڵای لێكۆڵینەوەی لەبارەی گومانی بەقاچاغفرۆشتنی نەوتی عێراق دەركرد.
روونی كردەوە، سوودانی فەرمانی داوە بە پێكهێنانی لیژنەیەكی باڵای لێكۆڵینەوە لە لایەنی پێوەندیدار بۆ لێكۆڵینەوە لەو زانیارییانەی لەبارەی بوونی گومانی گەندەڵی لە تێكەڵكردن و بەقاچاغفرۆشتنی بەرهەمە نەوتییەكان لە بەندەرەكانی عێراق یان لە ناو ئاوی نێودەوڵەتی دەكەن.
بەپێی بەیاننامەكە سوودانی دووپاتی لە دەستسووكنەكردن لەو دۆسیە كردووەتەوە، لیژنەكە دوای كۆتاهاتنی لێكۆڵینەوەكانی راسپاردەی خۆی پێشكەش ئەنجوومەنی وەزیران بكات بۆ وەرگرتنی رێوشوێنی پێویست بەپێی یاسا و بەو شێوەی پاڵپشتی لە ئابووریی نیشتمانی دەكات و سامانی گشتی دێتە پاراستن.
وەڵام بدەوه