سێ یەم کاروانى هێزى ئەمریکا کشایەوە

بەپێی رێككەوتنی بەغدا و واشنتن پێویستە لە مانگی ئەیلوولی داهاتوو هێزی سەربازیی هاوپەیمانان و ئەمەریكا لە بنكە سەربازییەكانیان لە عێراق بكشێنەوە، لە ماوەی دوایی جموجۆڵێك بنكە سەربازییەكانی ئەوانی لە عێراق گرتووەتەوە و دوێنێ و ئەمڕۆ دوو كاروانی سەربازی عێراقیان بەرەو سووریا جێهێشتووە.

سەرچاوەیەكی ئاگەدار دەڵێت، دووەم كاروانی سەربازیی سوپای ئەمەریكا بنكەی سەربازیی عەین ئەسەدی لە پارێزگای ئەنبار بەرەو بنكە سەربازییەكانی ئەو وڵاتە لە سووریا جێهێشتووە، كاروانەكە لە ژمارەیەك بارهەڵگری پێك هاتووە لەناو پاسەوانیەتێكی توند، ئێوارەی ئەمڕۆ سێشەم لە عەین ئەسەدەوە رۆیشتوون بەرەو بنكە سەربازییەكانی ئەمەریكا لە سووریا، بەتایبەتی لە شاری حەسەكە.

ئەوە دووەم كاروانی سەربازیی سوپای ئەمەریكایە لە ماوەی 24 سەعات عێراق بەرەو سووریا جێبێڵن، كاروانەكان بریتی بوون لە ژمارەیەك بارهەڵگر كە كەرەستە و ئۆتۆمبێلی سەربازییان هەڵگرتبوو، وەك ئاماژەیەك بۆ دەست پێكردنی پاشەكشەی سەربازیی هاوپەیمان و ئەمەریكا لە عێراق.

دوێنێ سەرچاوەیەك ئاماژەی كرد كە یەكەم قۆناغی كشانەوەی هێزەكانی ئەمەریكا لە بنكەی عەین ئەسەد بەرەو سووریا دەستی پێ كردووە، كاتێك دەست بە كشانەوەی هێزی سەربازیی هاوپەیمانان لە عێراق كراوە و یەكەم كاروانی سوپای ئەمەریكا لە بنكەی سەربازیی عەین ئەسەد لە پارێزگای ئەنبار، كە ژمارەیەك بارهەڵگری سەربازی لەخۆ گرتووە و ئۆتۆمبێلی زریپۆشی سەربازییان هەڵگرتووە، بەرەو خاكی سووریا رۆیشتوون. 

هاوكات لەگەڵ كشانەوەی هێزە سەربازییەكانی ئەمەریكا و هاوپەیمانان، لیژنەی ئاسایش و بەرگریی پەرلەمانی عێراق نیگەرانیی خۆی لەو كارە دەربڕی بەوەی رێگە بۆ ئاڵۆزبوونی دۆخی تەناهی لە ناو عێراق و سنوورەكان لەگەڵ سووریا خۆش دەكات، عەباس جبووری شارەزای ستراتیجی پێی وایە كشانەوەی هێزەكانی ئەمەریكا لە سایەی گۆڕانكارییەكانی ناوچەكە، قۆناغێكی هەستیارە بۆ عێراق.

روونی كردەوە، كشانەوەكە مانای دروستبوونی بۆشاییەكی تەواو نییە، بەڵام دەبێتە هۆی لاوازبوونی توانای هەواڵگریی عێراق و پاڵپشتیی سەربازی كە هاوپەیمانان دابینیان دەكرد، بۆیە دوای ئەم هەنگاوە عێراق لە دووڕیانێك دەوەستێت، یان سوودلێوەرگرتنی بۆ بەهێزكردنی توانای هێزە تەناهییەكان و پاراستنی سەروەریی خۆی، یان رووبەڕووبوونەوەی مەترسیی سوودبینین لە دۆخەكە لە لایەن پاشماوەی تیرۆر و میلیشیاكانەوە، بەتایبەتی لە سایەی پەرەسەندنی ئاڵۆزییەكان لە نێوان ئیسرائیل و ئێران.