سه‌رۆكی ئه‌نجوومه‌نی نوێنه‌رانی عێراق ڕه‌تی كرده‌وه كه بڕیاری ده‌ستله‌كاركێشانه‌وه‌ی له سه‌رۆكایه‌تی ئه‌نجوومه‌نی نوێنه‌رانی عێراق له‌گه‌ڵ هیچ كه‌سێك تاوتوێ كردبێت و له هه‌مانكاتیشدا داوای له سه‌رجه‌م لایه‌نه سیاسییه‌كان كرد ڕووبه‌ڕووی قه‌یرانه‌كانی ئێستا ببنه‌وه.
محه‌مه‌د حه‌لبووسی سه‌رۆكی ئه‌نجوومه‌نی نوێنه‌رانی عێراق بۆ ئاژانسی ده‌نگوباسی فه‌رمی عێراق ڕایگه‌یاند: بڕیار بوو دانیشتنی په‌رله‌مان له 20ی ئه‌م مانگه به‌ڕێوه‌بچێت، به‌ڵام له‌سه‌ر داوای مسته‌فا كازمی سه‌رۆك وه‌زیرانی عێراق دانیشتنه‌كه دواخرا.
ڕاشیگه‌یاند: بڕیاری ده‌ستله‌كاركێشانه‌وه‌م له‌گه‌ڵ هیچ سه‌رۆك فڕاكسیۆنێكی سیاسی و هیچ هاوكارێكم تاوتوێ نه‌كردووه.
حه‌لبووسی ئاماژه‌ی به‌وه‌ش دا كه پۆست ئه‌ركه و پێویسته هه‌موولایه‌ك ئاگاداری هه‌ستیاری قۆناغه‌كه بن.
سه‌رۆكی ئه‌نجوومه‌نی نوێنه‌رانی عێراق داواشی له سه‌رجه‌م لایه‌نه سیاسییه‌كان كرد هه‌ست به به‌رپرسیاره‌تی دۆخه‌كه بكه‌ن و ڕووبه‌ڕووی قه‌یرانه‌كانی ئێستای عێراق ببنه‌وه.
جێی باسه ئه‌مڕۆ دووشه‌م محه‌مه‌د حه‌لبووسی سه‌رۆكی ئه‌نجوومه‌نی نوێنه‌رانی عێراق به فه‌رمی داواكاری ده‌ستله‌كاركێشانه‌وه‌ی له پۆسته‌كه‌ی پێشكه‌ش به په‌رله‌مان كرد، بڕیاریشه دووسبه‌ی چوارشه‌م په‌رله‌مان كۆببێته‌وه و یه‌كه‌م بڕگه‌ی كۆبوونه‌وه‌كه‌ش ده‌نگدان ده‌بێت له‌سه‌ر ئه‌م داوایه‌ی حه‌لبووسی.
وەڵام بدەوه