لەگەڵ پەرەسەندنی زیاتری دۆخە تەناهییەكە لە عێراق و ناوچەكە، شارەزایان پێشبینی دەكەن ئەمەریكا و ئیسرائیل جموجۆڵە جیاوازە سەربازییەكانیان فرەوانتر بكەن، بەتایبەتی لە بواری پاراستنی بەرژەوەنییەكانیان، لەناو بوونی ئاماژە بۆ ئەگەری كردنەئامانجی گرووپە چەكدارەكان لە عێراق.
نزار حەیدەر توێژەری سیاسی دەڵێت، تا ئێستە و بەشێوەیەكی سەرەكی عێراق پشت بە ئەمەریكا دەبەستێت لە پاراستنی ئاسایش و سەقامگیرییەكەی، جا لە رێگەی رێككەوتنی چوارچێوەی ستراتیجی یان پرۆتۆكۆلی بەرگریی هاوبەش بێت، یان لە چوارچێوەی هاوپەیمانیی نێودەوڵەتی دژ بە داعش، یان لە چوارچێوەی تر كە پێوەندییەكانی تەناهیی هەردوولا دیاری دەكەن.
روونی كردەوە، ئەمەریكا پێشبینیی پەرەسەندنی هێرشەكان لە عێراق لە چەند رۆژی داهاتوو دەكات، پێشبینی هەیە كە ئیسرائیل پەنا بۆ لەناوبردنی چەند ئەندامێكی گرووپە چەكدارەكان لە عێراق ببات، لەوانەی لە ماوەی رابردوو ئەوانیان كردە ئامانج، زیاتر گوتی، ئێستە ئەمەریكا بە دوو رێگە جموجۆڵ دەكات، یەكەمیان خۆپارێزی بە مەبەستی پاراستنی بەرژەوەندی و بنكە سەربازییەكانی و دووەم دابینكردنی ئاسایشی هاوپەیمانەكانی لە ناوچەكە لە سایەی ئەگەری پەرەسەندنی دۆخەكە
ئاماژەی كرد، ئەمەریكا توانا بەرگرییەكانی بەهێز دەكات، بەتایبەتی لە بواری ئاسمانی لەناو عێراق، جیا لە جموجۆڵەكانی لەسەر ئاستی هەرێمەكە وەك خۆسازدان بۆ هەر رووبەڕووبوونەوەیەك رەنگە لە ناوچەكە دروست ببێت، حەیدەر زیاتر گوتی، ئەگەری هەیە ئەمەریكا روو لە ئۆپراسیۆنی سەربازیی سنووردار لە دژی ئەو شوێنانەی هێرشی درۆنیان لێوە دەكرێت یان جبەخانەی چەكی هەندێك لە گرووپە چەكدارەكان بكات، ئەوەش وا دەكات عێراق زەرەرمەندی گەورە بێت ئەگەر ئەو گرووپە چەكدارانە لە پێداگرتن بەردەوام بن، سەرەڕای هەوڵەكانی حكوومەت بۆ كۆنترۆڵكردنی چەكی بەرەڵا.
وەڵام بدەوه