بەپێی ئەو پێشنیازەی رائید مالیكی ئەندامی لیژنەی دارایی پەرلەمانی عێراق پێشكەشی كردووە، هەر پارێزگایەكی عێراقی وەك بازنەیەكی دەنگدان حسێب دەكرێت، جیا لە بەغدا و بەسرە و نەینەوا، ئەوانە هەریەكەیان دەكرێنە دوو بازنە، جیا لەوە ژمارەی كاندیدانی هەر لیستێك نابێت لە ژمارەی كورسییەكانی دیاریكراو بۆ هەر پارێزگایەك زیاتر بێت، بەوەش رێگری لە كاندیدكردن بە مەبەستی كۆكردنەوەی دەنگ دەگیرێت كە لە لایەن هەندێك حزبەكان پیادە دەكرێت.
هەر بەپێی هەموارە پێشنیازكراوەكە، 30%ی كورسییەكان لە هەر بازنەیەكی دەنگدان بۆ ئەو كاندیدانە تەرخان دەكرێت كە بەرزترین رێژەی دەنگیان بە دەست هێناوە و رێژەی 1.5%یان تێپەڕ كردووە، لەوكاتەی 70%ی كورسییەكان بۆ كاندیدی لیستەكان دەبێت، لەگەڵ گۆڕینی هاوكێشەی حسێبكرنی كورسییەكان بەپێی سیستمی سانت لیگۆ بە شێوەیەك لە بری 1.7، لە 1.5ەوە دەست پێ بكات.
جیا لەوە هەر كەسێك پۆستی هەبێت، لە كاتی خۆكاندیدكردنی بۆ پەرلەمان پێویستە دەست لە پۆستەكەی بكێشێتەوە، ئەوەش بۆ رێگرتن لە دووپۆستی و بەكارهێنانی پۆستەكەی بۆ مەبەستی بانگەشەی هەڵبژاردن، جیا لەوە دانانی رێوشوێنی توند بۆ رێگرتن لە بەرنامەی تۆڕی كۆمەڵایەتی و دابەشكردنی پارچە زەوی و پێشكەشكردنی خزمەتگوزارییەكان بۆ مەبەستی بانگەشەی هەڵبژاردن.
وەڵام بدەوه