فیراس ئەلنەجماوی، شارەزای بواری ئەمنی و سیاسی ئەمڕۆ سێشەممە (25ی ئاداری 2025) دووپاتی کردووەتەوە کە ئەمریکا پاڵپشتی لە بەهێزکردنی تواناکانی سەربازیی هێزە فەرمییەکانی عێراق دەکات، بەڵام ڕەتی دەکاتەوە پاڵپشتیی هێزەکانی حەشدی شەعبی بكات.
ئەلنەجماوی لە چاوپێکەوتنێکدا لەگەڵ (بەغدادئەلیەوم) ڕوونی کردووەتەوە "سەرەڕای بەدەستهێنانی ئەزموونی شەڕ لەلایەن حەشدەوە لە کاتی شەڕەکانیان دژی داعش، بەڵام مەشقی سەربازی وەک هێزەکانی سوپا و پۆلیس و دژەتیرۆر ئەنجام نادەن".
ئاماژەی بەوەش کرد، "واشنتۆن بەردەوامە لە مەشق و ڕاهێنان بە هێزە فەرمییەکانی عێراق، بەڵام حەشدی شەعبی پشتگوێ خستووە، بەو پێیەی ئەوان لەژێر فەرماندەیی ئەجێندای دەرەکیدان".
ئەمە لە كاتێكدایە ئەمەریکا ڕۆڵی گەورەی بینی لە بنیاتنانی تواناکانی هێزە عێراقییەکان لە دوای ساڵی 2003، لە ڕێگەی پرۆگرامی جۆراوجۆری مەشق و ڕاهێنان و چەکداركردن، بەتایبەتی بۆ سوپای عێراق و دەزگای بەرەنگاربوونەوەی تیرۆر.
بەڵام بە هەموو شێوەكان هەڵوێستی خۆی لە دژی گرووپە چەكدارەكانی حەشدی شەعبی ڕاگەیاندووە و داوای لە حكوومەتی عێراق كردووە ئەو هێزانە نەهێڵێتەوە و چارەسەریان بكات.
وەڵام بدەوه