ركابەرە سەرەكییەكەی نووری مالیكی بەرەیەكی نوێی راگەیاند

لەلایەن ژمارەیەكی زۆر لە سوننەكان و بەشێك لە شیعەكان، بەرەیەكی نوێ‌ راگەیەنرا و بۆ هەڵبژاردنی داهاتووی عێراق بەشداریی پرۆسەی سیاسی دەكەن.

ئەمڕۆ شەموو 15ـی شوبات، كۆمەڵەی مەدەنیی نیشتمانیی عێراق لەلایەن ئەیاد عەلاوی، ساڵح موتڵەگ، ڕائید فەهمی و جەعفەر عەلاوی ڕاگەیەنرا.

ئەوە كۆمەڵەیەكی نوێیە و بە دروشمی دادپەروەری و یەكسانی و بە مەدەنیكردنی كۆمەڵگە، بەشداریی لە هەڵبژاردنی پەرلەمانی عێراق دەكەن و بە گوتەی خۆیان، دەیان سیاسی هەن لە گۆڕەپانەكەدا پێوەندییان پێوە دەكەن. 

دەشڵێن جگە لە كەسایەتییە سوننەكان، بە دەیان بەرپرسی شیعەش لە داهاتوویەكی نزیكدا پێوەندیكردنی خۆیان بەو بەرەیە رادەگەیەنن، ئەوە جگە لە كەسایەتیی تری ڕەوتە سیاسی و مەدەنییە جیاوازەكان.

عەلاوی لە خوێندنەوەی بەیانی راگەیاندنی ئەو كۆمەڵەیە دەڵێت، ڕاگەیاندنی ئەو كۆمەڵەیە لە چوارچێوەی ئامادەكارییەكان دێت بۆ هەڵبژاردنی داهاتوو كە بڕیارە لە كۆتایی ئەمساڵدا بكرێت.

لە گۆڕەپانی سیاسیی عێراق و بەتایبەت لەناو عەرەب، پێشتر تەنیا ئەیاد عەلاوی بە ركابەری نووری مالیكی دەزانرا، بۆیە بەشێك لە میدیاكان دووبارە دەڵێن ركابەرە سەرەكییەكەی مالیكی دەستی بەكار كردەوە.