ئەمڕۆ دادگای فیدراڵی فەرمانێكی وەلائی دەركرد و جێبەجێكردنی هەرسێ یاسای پەسندكراوی هەمواری باری كەسێتی و لێبوردنی گشتی و گەڕاندنەوەی زەویزارە زەوتكراوەكانی كەركووكی وەستاند، كە پێوەست بوون بە هەرسێ پێكهاتەی شیعە و سوننە و كوردەوە، دوای بڕیارەكە محەمەد حەلبووسی سەرۆكی حزبی تەقەدوم، بە توندی هێرشی كردە سەر دادگای فیدراڵی و بە نادەستووری لە قەڵەم دا.
بڕیارەكەی ئەمڕۆی دادگای فیدراڵی دووەم گورز بوو بۆ حەلبووسی، چونكە ئەو بە بڕیارێكی هاوشێوە لە لایەن دادگاكە لە سەرۆكایەتی و پەرلەمانی عێراق دوور خرایەوە، ئێستەش یاسای لێبوردنی گشتی كارتێكی بەهێزی حەلبووسی بوو بۆ گەڕانەوەی بۆ ناو كایەی سیاسی و بردنەوەی لە هەڵبژاردنی داهاتووی پەرلەمانی عێراق لە كۆتایی ئەمساڵ.
حەلبووسی لەبارەی بڕیارەكەی ئەمڕۆی دادگای فیدراڵی گوتی، بە بەردەوام گوتوومانە كە یاسای لێبوردنی گشتی گەڕاندنەوەی مافی بێتاوان و ستەملێكراوانە و بە هیچ شێوەیەك ئازادكردنی تیرۆریستان ناگرێتەوە، ئێمە پێش هەموو كەس قبووڵ ناكەین ئەوان ئازاد بكرێن و بە ئاگری ئەوان سووتاوین.
حەلبووسی دادگای فیدراڵی بە سیاسی تۆمەتبار كرد و گوتی، قبووڵی ناكەین دادگا نادەستوورییەكە یاساكان بە سیاسی بكات و بێبایەخیان بكات و فەرمانی وەلائی ستەمكارانە دژی بێتاوان و ستەملێكراوان دەربكات، بۆیە بە هەموو رێگەیەكی یاسایی و جەماوەری رووبەڕووی بڕیارەكە بە وەستانی جێبەجێكردنی یاسای لێبوردنی گشتی دەبینەوە و داوای خۆپێشاندانی فرەوان دەكەین كە كورسیی ستەمكاران بلەرزێنێت و دەسەڵاتی دادوەر جاسم عومێری سەرۆكی دادگاكە رەت بكەنەوە.
لە كۆتاییدا حەلبووسی داوای پەرەسەندنی هەنگاوەكانی لە دژی دادگاكە و هەموو دامەزراوەكان كرد كە رێز لە ویستی گەل و رێككەوتنەكانی نێوان پێكهاتەكانی عێراق ناگرێت، لە رێگەی بایكۆتكردنیانەوە.
وەڵام بدەوه