سوودانی عێراقی بەجێهێشت

محەمەد شیاع سوودانی سەرۆك وەزیرانی عێراق، بەغدای پایتەختی بەرەو تاران جێهێشت و بڕیارە چەند كۆبوونەوەیەك لەگەڵ بەرپرسانی ئێران ئەنجام بدات.

ئەمڕۆ چوارشەم هەشتی كانوونی دووەم، محەمەد شیاع سوودانی سەرۆك وەزیرانی عێراق، بەغدای جێهێشت و بەرەو تاران كەوتە ڕێ‌.

 بڕیارە سوودانی لە سەردانەكەی چاوی بە بەرپرسانی باڵای ئەو وڵاتە بكەوێت، ئەوەی هاتووەتە راگەیاندن، ئەوان باسی دۆخی ناوچەكە و سووریا دەكەن، شارەزایان پێیان وایە ئەو پەیامێكی ئەمەریكای پێیە و مەترسیی دۆخی عێراق و گوشارەكانی سەری بۆ بەرپرسانی ئێران روون دەكاتەوە، بەتایبەتی پێوەست بە هەڵوەشاندنەوەی میلیشیا شیعەكانی نزیك لە ئێران.

دوو بەرپرسی عێراق لەبارەی سەردانەكەی سوودانی بۆ تاران پێیان وایە، باسی هەڵوەشاندنەوەی میلیشیاكان و رێكخستنەوەیانە بۆ خۆلادان لە گوشارەكانی ئەمەریكا و رۆژئاوا دەكات، یەكێك لەو بەرپرسانە ئاشكرای دەكات، بابەتی میلیشیاكان و كەمكردنەوەی رۆڵی ئەوان تا نزمترین ئاست، تەوەری سەرەكیی گفتوگۆكانی سوودانییە لە تاران، سوودانی داوا لە تاران دەكات یارمەتی بدەن لەو كارە، چونكە عێراق نایەوێ بە پاساوی ئەوان دۆخی عێراق بشێوێت، لەوكاتەی بەرپرسەكەی تر ئاشكرای كرد كە ئەو بابەتە لە سەردانەكەی دوایی ئیسماعیل قائانی فەرماندەی فەیلەقی قودس بۆ بەغدا باس كراوە.

روونی كردەوە، شاندی عێراق لە تاران چەند دۆسیەیەك تاوتوێ دەكەن، گرنگترینیان دووركەوتنەوە و دەستوەرنەدان لە دۆخی سووریا و رێكخستنەوەی میلیشیاكان و وەستانی چالاكییەكانیان، ئاشكرابوونی هەبوونی درۆنی دوورمەودا لای ئەوان و گوشارەكانی سەر بەغدا بۆ وەستانی بەرهەمهێنان و هێنانی ئەو درۆنانە لە ئێران

لای خۆیەوە ئیحسان شمەری سەرۆكی ناوەندی بیركردنەوەی سیاسی دەڵێت، سەردانەكەی سوودانی زۆر گرنگە، ئەوەش بەهۆی گرنگیی ئەو دۆسیانەی باسیان دەكات، ئەو دەیەوێ كاریگەریی لە ئێران بكات بۆ نەهێشتنی چەكی بەڕەڵا و دوورخستنەوەی عێراق لە ململانێكان، چونكە ئەگەر چەكی میلیشیاكان بمێنێت، ئەگەری روودانی چەندان سیناریۆ لە عێراق هەن، بەهۆی ئەوەی رووخانی رژێمی سووریا گۆڕانكاری لە رۆژهەڵاتی ناوەڕاست دروست دەكات.