پەرەسەندنەكانی دۆخی سووریا زۆر خێرا و چاوەڕواننەكراون، گرووپە چەكدارەكان، كە لە هەفتەی رابردووەوە دەستیان بە هێرشەكانیان كرد، ئێستە بەرەو تەواوی شارەكانی سووریا و دیمەشقی پایەتەخت لەپێشڕەویدان، ئەوەش ترس و دڵەڕاوكێی گەورەی لای شیعە دروست كردووە، موقتەدا سەدر، سەركردەی رەوتی سەدر دووپاتی كردەوە كە ئەوەی روو دەدات بابەتێكی ناوخۆیی سووریایە و نابێت لە لایەن عێراقەوە دەستی تێبخرێت.
سەدر لە پۆستێكی لە تۆڕی كۆمەڵایەتیی ئێكس نووسیویەتی، بەوردی چاودێریی دۆخی سووریای دراوسێ دەكەین، هیچمان بۆ گەلەكەی بە هەموو هۆز و تایفەكانییەوە نییە جیا لە دوعاكردن بۆیان، مەگەر خوای گەورە بەڵا و تیرۆر و توندڕۆیی و ستەم و تاریكی و تایفیەت و دەستوەردانی دەرەكیان لەسەر لابدات.
روونی كردەوە، تا ئێستە لەسەر هەڵوێستی خۆمانین بە دەستوەرنەدان لە كاروباری سووریا و نەوەستانەوە دژی بڕیارەكانی گەل، چونكە ئەو تاكەلایەنی پێوەندیدارە بە دیاریكردنی چارەنووسی خۆی، بەڵام هیوامان وایە هەمووان بەدوای پلانەكانی سێكوچكەی ئەمەریكا و بەریتانیا و ئیسرائیل و ئەوانەی لەسەر ئەو رەوتەن نەكەون، بۆ وێرانكردنی ئاین و یەكێتی ریزەكان و نانەوەی دووبەرەكی.
سەدر دووپاتی لە پێویستی دەستوەرنەدانی عێراق وەك حكوومەت و گەل و هەموو لایەن و ملیشیاكان و هێزە تەناهییەكان لە كاروباری سووریا كردەوە، وەك چۆن هەندێكیان پێشتر ئەو كارەیان كردووە، بۆیە پێویستە حكوومەت رێگریان لێ بكات و سزای هەر لایەنێك بدات كە پێشێلی ئاسایش و ئاشتەوایی و بیروباروەڕ لە عێراق بكات.
وەڵام بدەوه