ڕێککەوتنی کۆتایی ئاشکراکرا

لیژنەی دارایی ئەنجوومەنی نوێنەرانی عێراق دوای كۆبوونەوەی لەگەڵ سەرۆك بارزانی و مەسرور بارزانی، سەرۆكی حكوومەتی هەرێمی كوردستان، دوا كۆبوونەوەی خۆی لەگەڵ شاندی حكوومەتی هەرێمی كوردستان ئەنجامدا و هەردوولا جەختیان لە خاڵی هاوبەش و لێكنزیكبوونەوەی زیاتر كردەوە بۆ چارەسەركردنی ڕیشەیی كێشە هەڵپەسێردراوەكانی نێوان هەولێر و بەغدا.

ئەمڕۆ پێنجشەممە 26ی 9ی 2024، فەرمانگەی میدیا و زانیاریی حكوومەتی هەرێمی كوردستان لە پەیجی تایبەتیی خۆی لە تۆڕی كۆمەڵایەتیی (فەیسبووك) كۆبوونەوەی هاوبەشی شاندی حكوومەتی هەرێمی كوردستان و لیژنەی دارایی ئەنجوومەنی نوێنەرانی عێراقی بڵاو كردەوە و ڕایگەیاند، كە "هەناردەکردنەوەی نەوت، دامەزراندن، بەردەوامیی مووچە، داهات و دەروازە سنوورییەکان، پرسی لێکتێگەیشتن و هاوکاریی دوولایەنەی کۆبوونەوەکانی لیژنەی دارایی پەرلەمانی عێراق و حکوومەتی هەرێمی کوردستان بوو."

لە پرێس كۆنفڕانسێكدا، سەرۆكی لیژنەی دارایی ئەنجوومەنی نوێنەرانی عێراق ڕایگەیاند: "لە كۆبوونەوەكانماندا لەگەڵ شاندی حكوومەتی هەرێمی كوردستان باسمان لە پرسی نەوت، دامەزراندن، مووچە و داهاتی نانەوتی و گومرگ و خاڵە ناكۆكەكانی نێوان هەردوولا كرد، كە هەردوولاشمان ڕژدین لەسەر ئەوەی كە ئەو كێشانە لەنێوان خۆماندا چارەسەر بكەین."

لەسەر چارەسەرییەكانی ئەو پرسانەی لەنێوان هەولێر و بەغدا بە هەڵپەسێردراوی ماونەتەوە، سەرۆكی لیژنەی دارایی ئەنجوومەنی نوێنەرانی عێراق ڕایگەیاند، بۆ شیكردنەوەی خاڵە جیاوازەكان كۆبوونەوەكان بەردەوامیان دەبێت و گوتیشی: "بۆ گفتوگۆكردن و گەیشتن بە خاڵی هاوبەش و چارەسەركردنی پرسە جیاوازەكانی نێوان حكوومەتی هەرێمی كوردستان و حكوومەتی عێراق، نیەتێكی ڕاستگۆیانە و پاك لەلایەن حكوومەتی هەرێمی كوردستانەوە هەیە."

سەرۆكی لیژنەی دارایی ئەنجوومەنی نوێنەرانی عێراق هیواشی خواست، كە ئەم ساڵ، "ساڵی كۆتاییهێنان بێت بە خاڵە ناكۆكەكانی نێوانمان." گوتیشی: "پێویستە لەم ماوەیەدا كۆتایی بەو كێشانە بێت و ئێمەش گەشبینین."

هەر لەو پرێس كۆنفڕانسەی، كە فەرمانگەی میدیا و زانیاری بڵاوی كردووەتەوە، كەمال محەممەد ساڵح، وەزیری سامانە سروشتییەكانی حكوومەتی هەرێمی كوردستان ڕایگەیاند، كە لە كۆبوونەوەكانیاندا پرسی هەناردەكردن و بڕی بەرهەمهێنان و كریی گواستنەوەی نەوت گەنگەشە كراوە و ئامادەشن، بۆ ئەوەی حكوومەتی عێراق ڕەزامەند بێت، "پێداچوونەوە بە گرێبەستە نەوتییەكاندا بكات."

ئومێد سەباح، سەرۆكی دیوانی ئەنجوومەنی وەزیران ڕایگەیاند، كە پابەندن بە هەموو مادەكانی بودجە و بۆ چارەسەركردنی تەواوی كێشەكانی نێوانیشیان، گوتیشی: "حكوومەتی هەرێمی كوردستان نیەتێكی ڕاستگۆیانەی بۆ چارەسەركردنی تەواوی كێشەكان هەیە."

ئەمە لە كاتێكدایە، لەماوەی ڕابردوودا، ئەنجوومەنی باڵای ئابووریی حكوومەتی عێراق هاتە هەرێمی كوردستان و دوو كۆبوونەوەی گرنگی لەگەڵ ئەنجوومەنی ئابووریی هەرێمی كوردستان بەسەرپەرشتی مەسرور بارزانی، سەرۆكی حكوومەتی هەرێمی كوردستان ئەنجامدا، كە ئەنجامێكی باشی هەبوو، تێیدا بڕیاردرا، مووچە بەردەوام لەلایەن حكوومەتی عێراقەوە دەنێردرێت.