دوێنێ سێشەممە، 17 ئەیلوولی 2024، ئیسماعیل قائانی، فەرماندەی هێزەکانی قودسی سوپای پاسدارانی ئێران، بە سەردانێکی ڕانەگەیەندراو گەیشتە بەغدای پایتەختی عێراق و چەندین کۆبوونەوەی لەگەڵ سەرکردە سیاسییەکانی چوارچێوەی هەماهەنگی و سەرکردەکانی چەند گرووپێکی چەکداریی عێراقی كرد، کە تاران پشتیوانییان دەکات.
سەردانەکەی قائانی بۆ بەغدا لە کاتێکدا بوو، کە قەیرانی سیاسیی عێراق قووڵتر و بەردەوامە، بەتایبەتی دوای ئاشکرابوونی تۆڕی چاودێریی سیخوڕیکردن لە نووسینگەی محمەد شیاع سوودانی، لە مانگی ڕابردوودا، هەروەها توندوتیژی و هێرشی میدیایی و گوتاری بەردەوامی هەندێک لە سەرکردەکانی چوارچێوەی هەماهەنگی، دیارترینیان نووری مالیکی، سەرۆکی ئیئتیلافی دەوڵەتی یاسا و قەیس خەزعەلی، سەرۆکی گرووپی عەسائیب ئەهلی حەق، لە دژی محەمەد شیاع سوودانی، سەرۆکوەزیرانی عێراق.
سەرچاوە ئاگادارەکان لە بەغدا بە ڕۆژنامەی (ئەلعەرەبی ئەلجەدید)یان ڕاگەیاندووە، کە قائانی بە سەردانێکی ڕانەگەیەندراو گەیشتووەتە بەغدا و لەو ماوەیەدا چەندین کۆبوونەوەی لەگەڵ سەرکردەکانی چوارچێوەی هەماهەنگی و سەرکردەکانی هەندێک لە لایەنە چەکدارەکانی عێراقدا كردووە و لەسەر پێویستیی چارەسەرکردنی قەیرانەکان و ڕاگرتنی هێرشی میدیایی دژ بە سوودانی و حکوومەتەکەی لەلایەن ئەو لایەنانەوە گفتوگۆی لەگەڵ کردوون.
سەرچاوەکان ئەوەشیان خستووەتە ڕوو، کە قائانی لە کۆبوونەوەکانیدا هەڵوێستی تارانی سەبارەت بە پێویستیی چارەسەرکردنی قەیرانەکان و ڕاگرتنی گرژییەکانی دژ بە سوودانی و حکوومەتەکەی گەیاندووەتە لایەنە سیاسی و میلیشیا چەکدارەکان.
بە گوێرەی ڕاپۆرتی ڕۆژنامەی (عەرەبی ئەلجەدید) قائانی لە کۆبوونەوەکانیدا لە بەغدا باسی لە کشانەوەی هێزەکانی ئەمریکا کردووە و جەختی لەسەر پێویستیی دانانی خشتەیەکی ڕوون و ڕاگەیەندراو بۆ ئەم کشانەوەیە کردەوە، هەروەها جەختی لەوە کردووەتەوە، بوونی ئەمریکا لەنزیک ئێران مەترسی و هەڕەشەی بۆ سەر ئاسایشی نەتەوەیی ئەو وڵاتە دروست کردووە.
تاران ماوەیەکە گوشار دەخاتە سەر بەغدا لە دۆسییەی کۆتاییهێنان بە ڕۆڵی هاوپەیمانیی نێودەوڵەتی و کشانەوەی هێزەکانی ئەمریکا لە عێراق، کە یەکێکە لە دۆسییە سەرەکییەکانی ئێران لە بواری کاروباری عێراقدا.
لەمبارەیەوە، محەمەد عەلی ئەلحەکیم، توێژەری سیاسی بە ڕایگەیاندووە: ”سەردانەکەی قائانی بۆ بەغدا لەم کاتەدا و لەم قۆناغەدا، کە بە قەیرانێکی سیاسیی گەورەی ڕانەگەیەندراودا تێدەپەڕێت، ئەوە دووپات دەکاتەوە، کە ململانێی نێوان هەندێک لایەن لە چوارچێوەی هەماهەنگی لەلایەک و محەمەد شیاع سوودانی لەلایەکی دیکەوە گەیشتووەتە قۆناغێکی مەترسیدار و بۆیە ئێران هاتووە دەست وەردەدات، تاوەكوو ڕیتمی ماڵی سیاسیی شیعە لە هەر ململانێیەکدا کۆنتڕۆڵ بكات.“
ئەلحەكیم ئاماژەی بەوەش داوە: ”ململانێی نێوان لایەنەکان لە چوارچێوەی هەماهەنگی و سوودانی گەیشتووەتە قۆناغێکی مەترسیدار و هەڕەشەی دوورخستنەوە و چوون بەرەو هەڵبژاردنی پێشوەختەی پەرلەمان واقیعی و ڕاستەقینەیە، دوای ئەوەی کە تۆڕی سیخوڕیی گوێگرتن بە شێوەیەکی سەرەکی سەرکردەکانی چوارچێوە و فراکسیۆنەکانی كردووەتە ئامانج و ئەمەش تووڕەیی لێ کەوتووەتەوە و ناکۆکییەکانی لەگەڵ سوودانی فراوانتر کردووە.“
ئەوەشی خستووەتە ڕوو: ”دوای دەستێوەردانی قائانی بۆ وەستاندنی گرژییەکانی سەر سوودانی و حکوومەتەکەی لەلایەن سەرکردەکانی چوارچێوەی هەماهەنگی و فراکسیۆنەکانەوە، ڕەنگە لە ڕۆژانی داهاتوودا گۆڕانکارییەکی بەرچاو لە ڕووی هێمنی و وەستاندنی هێرشی میدیاکانی عێراق ببینین.“
وەڵام بدەوه