بەرپرسی نوێنەرایەتی حكوومەتی هەرێمی كوردستان لە بەغدا دووپاتی كردەوە كە پڕۆژەی هەژماری من بەردەوام دەبێت و گفتوگۆكانی هەولێر و بەغدایش لەمبارەوە بەردەوامن.
ئەمڕۆ پێنجشەم چواری نیسانی 2024، فارس عیسا بەرپرسی نوێنەرایەتی حكوومەتی هەرێمی كوردستان لە بەغدا بە رۆژنامەنووسانی راگەیاند، گفتوگۆكانی نێوان هەولێر و بەغدا بەردەوام دەبن و شاندی حكوومەتی هەرێمیش كە لەبەغدا بوون، لەسەر شێوازی ناردنی مووچە لەگەڵ وەزارەتی دارایی حكوومەتی فیدراڵ رێككەوتوون.
فارس عیسا ئەوەیشی بە رۆژنامەنووسان راگەیاند، پڕۆژەی هەژماری من وەك خۆی بەردەوام دەبێت بۆ دابەشكردنی مووچەی فەرمانبەرانی هەرێمی كوردستان لە رێگەی سیستمی بانكییەوە.
بەرپرسی نوێنەرایەتی حكوومەتی هەرێمی كوردستان لە بەغدا روونی كردەوە، سەرۆكی بانكی ناوەندیی عێراق لەبارەی پڕۆژەی هەژماری منەوە دووپاتی كردووەتەوە كە پێشتر لەگەڵ مەسروور بارزانی سەرۆكی حكوومەتی هەرێمی كوردستان لە سەرەتای دەستپێكردنی پڕۆژەكە هاوئاهەنگییان لەگەڵ حكوومەتی هەرێم كردووە و هیچ كێشەیەك لە پڕۆژەكەدا نییە.
رۆژی چوارشەم 3/3/2024، مەسروور بارزانی سەرۆكی حكوومەتی هەرێمی كوردستان، لە ڕاگەیەنراوێكی فەرمیدا "چارەسەربوونی كێشەی مووچە"ی ڕاگەیاند و دڵنیایی بە خەڵكی كوردستان دا كە لەگەڵ گەیشتنی بودجەی مانگی سێ، دەست بە دابەشكردنی مووچە دەكرێت لە پێش جەژندا.
لای حۆیەوە شاندی حكوومەتی هەرێم بە سەرۆكایەتیی وەزیری دارایی، هەمان رۆژ لە بەغداوە گەڕانەوە هەولێر و دوا ر}ێككەوتنیان لەگەڵ وەزارەتی دارایی عێراق ڕاگەیاند، دوای ئەوەی بارزانی و سوودانی هەموو بەربەستەكانی بەردەم كێشەی مووچەیان چارەسەر كرد.
وەڵام بدەوه