پەرلەمانتارێكی پارتی دیموكراتی كوردستان لە بەغدا رایدەگەیەنێت، وەكوو فراكسیۆنی پارتی، بە نووسراوی فەرمی داوای قەرەبووكردنەوەی سووتانی دوكانەكانی لەنگەی هەولێر و لافاوی دهۆك و زاخۆیان لە حكوومەتی عێراق كردووە. ئاماژە بەوەش دەدات، بەداخەوە بەردەوام لەلایەن حكوومەتی عێراقەوە جیاوازیی ئەو قەرەبووكردنەوانە لەنێوان ناوچەكانی هەرێمی كوردستان و عێراقدا دەكرێت.
شێروان دووبەردانی، پەرلەمانتاری پارتی دیموكراتی كوردستان، رایگەیاند، بە نووسراوی فەرمی داوایان لە سەرۆكایەتیی ئەنجوومەنی وەزیرانی عێراق كردووە، كە قەرەبووی زەرەرمەندانی سووتانی لەنگەی هەولێر و هەروەها ئەو لافاو و كارەساتە گەورەیە بكەنەوە، كە لە چەند رۆژی رابردوو بەسەر دهۆك و زاخۆدا هات، كە بەهۆیەوە سێ كەس گیانیان لەدەست دا و ژمارەیەكی زۆری خەڵكیش بریندار بوون، جگە لە زیانە گیانییەكان، بە سەدان ئۆتۆمبێل و ماڵ كەوتنە بەر لافاوەكە و زیانی مادیی یەگجار زۆریان بەر كەوت. گوتیشی: ”داوامان لە حكوومەتی عێراق كردووە، لەو پارەیەی ساڵانە لە بودجەی گشتی بەناوی فریاكەوتنی خێرا دابین دەكرێت، بڕێكی وەكوو قەرەبوو بدرێت بەو خەڵكە زەرەرمەندە لە هەرێمی كوردستان، چونكە ئەو پارەیە بۆ هەموو عێراق تەرخان دەكرێت، بە هەرێمی كوردستانیشەوە.“
ئەو پەرلەمانتارە راشیگەیاند، بەداخەوە بەردەوام حكوومەتی عێراق جیاوازیی لەنێوان هەرێمی كوردستان و ناوچەكانی دیكەی عێراقدا دەكات، هەروەكوو ئەوەی ئێستا بەهۆیەوە گەورەترین كێشە دروست بووە، كە مووچەیە.
گوتیشی: ”هیوادارین ئەنجوومەنی وەزیرانی عێراق، كە دەسەڵاتی خەرجكردنی ئەو پارەیەی هەیە و لە دوو رۆژی داهاتوودا كۆدەبێتەوە، جیاوازی نەكات لەنێوان هەرێمی كوردستان و عێراق و قەرەبووی زیانلێكەوتوانی لەنگەی هەولێر و لافاوەكەی دهۆك و زاخۆ بكاتەوە.“
وەڵام بدەوه