ئەمڕۆ پێنجشەممە دادگای باڵای فیدراڵی لە عێراق بڕیارێكی لەبارەی ئینتەرنێتەوە دەركرد، كە تیایدا ژمارەیەك لە ماڵپەڕ و تۆڕی كۆمەڵایەتیی قەدەغە كردووە، ئەوانەی بابەتی ڕووت و دوور لە بەها باڵاكان و دژە ئایینەكان بڵاو دەكەنەوە.
ماڵپەڕی (عەرەبی ئەلجەدید) بڵاوی كردەوە كە بەپێی بەیاننامەیەكی دادگاكە، هەریەك لە وەزارەتی گواستنەوەی حكوومەتی فیدراڵی و دەستەی راگەیاندن و پەیوەندییەكانی عێراق پابەند دەكرێن بە بلۆككردنی چەندین ماڵپەڕ و تۆڕی كۆمەڵایەتی، كە بابەتی دوور لە بەها باڵاكانی كۆمەڵگەی عێراقی بڵاو دەكەنەوە.
بڕیارەكە باسی لەو ماڵپەڕ و تۆڕە كۆمەڵایەتییانەش كردووە كە بابەتی دژە ئایین بڵاو دەكەنەوە، ئەوانەی سووكایەتی بە كتێبە پیرۆزەكان و پێغەمبەرەكان و سیمبۆلە ئایینییەكان دەكەن.
جێی باسە ئەمە یەكەم جار نییە لە عێراقدا بڕیاری هاوشێوە دەردەكرێ و نایەتە جێبەجێكردن، سەرباری ئەوەش دادگای فیدراڵییش بە ناو هیچ ماڵپەڕ و تۆڕێكی كۆمەڵایەتیی دیاریكراوی ئاشكرا نەكردووە، كە پێویستە بلۆك بكرێن.
وەڵام بدەوه