پەیامنێری كەناڵێكی بەناوبانگی عەرەبی ئاشكرای دەكات، لە عێراقدا هاوشێوەی ساڵی 2003، ئامادەكاریی بۆ هێرشێكی پێشیبینیكراوی ئەمریكا كراوە.
ئەحمەد حەمدانی، پەیامنێری كەناڵی (العربیة) لە پێگەی خۆی لە تۆڕی (X) بڵاوی كردەوە، عێراق سەرجەم تەگبیر و ئامادەكارییەكانی هاوشێوەی ساڵی 2003ی كردووە، بۆ هێرشێكی پێشبینیكراوی ئەمریكا.
ڕوونیشی كردۆتەوە كە ڕێوشوێنەكان بریتین لە: (ئامادەكردنی پەناگەی تۆكمە، چۆڵكردنی پێگە هەستیارەكان، گۆڕینی شوێنی سەركردەكان و جێگیربوونیان لەو شوێنانەی كە دانیشتوانیان زۆرە، گۆڕینی ئامێرەكانی تەلەفۆن، ئاگاداربوونێكی زۆر لە بەكارهێنانی ئامێرەكانی پەیوەندیكردن بە ڕێگەی ئاسایی، خستنەئامادەباشیی كادیرانی پزیشكی و شۆفێری ئەمبوڵانسەكان و راگەیاندنی باری لەناكاوی (ج)، خستنەئامادەباشیی تەواوی تیمەكانی بەرگریی شارستانی و ئامادەكارییەكی گەورە بۆ ڕووبەڕووبوونەوەی سەرزەوی).
ئەو پەیامنێرەی كەناڵە عەرەبییەكە ڕوونیشی كردۆتەوە كە وەك هەمان هەستوسۆزی ساڵی 2003، عێراقییەكان بەسەر دوو بەرەدا دابەش بوون، بەرەیەك پشتیوانیی هێرشە پێشبینیكراوەكەی ئەمریكا دەكەن و بەرەیەكیش ڕەتی دەكەنەوە، ”تەنیا ئەوە ماوە سروودێكی حەماسیی وەك سروودی (ياكاع ترابج كافوري، عالساتر هلهل شاجوري) بگوترێتەوە!“
ئەمە لە كاتێكدایە كە شەوی رابردوو میدیاكان بڵاویان كردەوە، لە ترسی هێرشی ئەمریكا، فەرماندە و سەركردەی میلیشیاكان ماڵ و شوێنی مانەوەی خۆیان گۆڕیوە.
جێگەی باسە لە دوای هێرشی میلیشیاكانی سەر بە ئێران لە عێراقەوە بۆ بنكەیەكی ئەمریكی لەنێو سنووری ئوردن كە بەهۆیەوە دەیان سەربازی ئەمریكا كوژران و بریندار بوون، ئەمریكا هەڕەشەی وەڵامدانەوەیەكی كاریگەری كرد، لە ترسی ئەو هەڕەشانەش، میلیشیای حزبوڵای عێراق شەوی رابردوو بە فەرمی راگرتنی هێرشەكانی بۆ سەر ئەمریكا راگەیاند.
وەڵام بدەوه