حه‌شدی شه‌عبی له عێراقه‌وه پشتیوانیی خۆی بۆ فه‌له‌ستینییه‌كان دەربڕی
ده‌سته‌ی گشتیی حه‌شدی شه‌عبی له عێراق پشتیوانیی خۆی بۆ "مقاومه‌ی فه‌له‌ستین" ده‌ربڕی كه ده‌ستی به ئۆپراسیۆنی "باهۆزی ئه‌قسا" له‌دژی ئیسرائیل كردوه.
حه‌شدی شه‌عبی له به‌یاننامه‌یه‌كدا رایگه‌یاند: وه‌ڵامی یه‌كلاكه‌ره‌وه‌و ده‌نگی ره‌تكردنه‌وه بۆ سه‌رجه‌م ده‌ستدرێژییه‌كانی زایۆنیزم به‌رزده‌كه‌ینه‌وه كه ده‌یكاته سه‌ر مزگه‌وتی ئه‌قسا و قودسی داگیركراو
ئێمه له‌م ساته مێژووییه‌دا پشتیوانیی ته‌واوی خۆمان بۆ به‌رگریكارانی فه‌له‌ستین راده‌گه‌یه‌نین و ده‌ست ده‌خه‌ینە ناو ده‌ستیان و داوای خۆڕاگرییان لێده‌كه‌ین، حه‌شدی شه‌عبی وای وتوه
به‌ره‌به‌یانی ئه‌مڕۆ بزووتنه‌وه‌ی حه‌ماسی فه‌له‌ستینی به مووشه‌ك هێرشی كرده‌سه‌ر ناوچه‌كانی ئیسرائیل و دواتر ئۆپه‌راسیۆنێكی به‌ناوی (باهۆزی ئه‌قسا) ده‌ستپێكرد و تیایدا چه‌كداره‌كانی دزه‌یان كرده ئیسرائیل و ژماره‌یه‌ك سه‌ربازیان كوشت و بریندار كرد
دوای هێرشه‌كه‌ی بزووتنه‌وه‌ی حه‌ماس، سوپای ئیسرائیل ده‌ستی به بۆردوومانكردن و تۆپبارانكردنی چه‌ند شوێنێكی غه‌زه كرد و له هه‌ندێك شوێنیش شه‌ڕ له‌نێوان سه‌ربازانی ئیسرائیل و چه‌كدارانی حه‌ماس روویدا
دواتریش بنیامین نه‌تانیاهۆ، سه‌رۆك وه‌زیرانی ئیسرائیل په‌یامێكی ڤیدیۆیی بڵاوكرده‌وه و تیایدا رایگه‌یاند: حه‌ماس هێرشێكی له‌ناكاوی له دژی ئیسرائیل و هاوڵاتییه‌كانی ئه‌نجامداوە و ئێستا ئێمه له جه‌نگداین و سه‌ریش ده‌كه‌وین، بزووتنه‌وه‌ی حه‌ماس باجێك ده‌دات تاوه‌كو ئێستا نه‌یدابێت
گوتیشی: بڕیارمدا به‌ر له هه‌ر شتێك ئۆردوگاكان له‌و تیرۆریستانه پاكبكرێنه‌وه كه دزه‌یان كردبووه ناویان فه‌رمانم دا به ده‌ستپێكردنی ئۆپه‌راسیۆنێكی سه‌ربازی گه‌وره و ئاماده‌كردنی سه‌ربازانی یه‌ده‌گ
وەڵام بدەوه