تەیف سامی ڕاستییەکان ئاشکرادەکات

تەیف سامی، وەزیری پێشووی دارایی عێراق، بەتوندی وەڵامی ئەو دەنگۆیانە دەداتەوە کە باس لە دیارنەمانی 140 ملیار دۆلار لە سەردەمی کابینەکەی محەممەد شیاع سوودانی دەکەن و بە "دوور لە ڕاستی" وەسفیان دەکات.
 دوای بڵاوبوونەوەی چەند دەنگۆیەک سەبارەت بە ونبوونی بڕی 140 ملیار دۆلار لە سامانی گشتیی وڵات لە سەردەمی سەرۆکوەزیرانی پێشوو، محەممەد شیاع سوودانی و بێدەنگبوون لێی، تەیف سامی هاتە دەنگ. لە ڕاگەیێندراوێکدا ئەو بانگەشانەی ڕەتکردەوە و ڕایگەیاند کە بەهۆی بوونی سیستەمێکی چاودێریی توندەوە، ونبوونی بڕێکی زۆری پارە بەو شێوەیە ئەستەمە.
 تەیف سامی ئاماژەی بەوە کردووە کە داهاتە نەوتییەکان لەلایەن دەستەی دەستپاکی و دیوانی چاودێریی داراییەوە لەژێر چاودێرییەکی تونددان؛ هەروەها پرۆسەکانی هەناردەکردن و فرۆشتنی نەوت لەژێر سیستەمێکی وردبینیی نێودەوڵەتیدان و لەلایەن کۆمپانیای تایبەتمەندەوە وردبینییان بۆ دەکرێت.
سەبارەت بە داهاتە نانەوتییەکانیش، ڕوونیکردووەتەوە کە بەهۆی چاکسازییەکان و جێبەجێکردنی سیستەمی گومرگی (ئەسیکۆدا)، کۆکردنەوەی داهات بەهێزتر بووە و بەتەواوی ڕێگری لە بەفیڕۆدانی سامانی گشتی کراوە.
 وەزیری پێشووی دارایی داوای لە لایەنە پەیوەندیدارەکانی ناو وەزارەتی دارایی و دیوانی چاودێریی دارایی کردووە، بە پشتبەستن بە داتا فەرمییەکان، وەڵامێکی پیشەیی و دروست ئامادە بکەن بۆ هەر لێدوان و بانگەشەیەک کە پێچەوانەی ئەو ڕاستییانە بێت کە لە تۆمار و ڕاپۆرتە چاودێرییەکاندا هاتوون، تاوەکو ڕای گشتی چەواشە نەکرێت.