لەلایەن وەزارەتی دارایی عێراق، بە هۆكاری نوێنەكردنەوەی فەرمانەكەی، 100 هەزار دیناری دەرماڵە لە مووچەی مانگی یەكی خانەنشینان كەم كراوەتەوە. بەرپرسێكی خانەنشینیش ئاشكرای دەكات، بابەتەكە پەیوەندیدارە بە عێراق و بڕیارەكە لە هەرێمی كوردستان نەدراوە.
بەرپرسێك لە بەڕێوەبەرایەتیی خانەنشینیی هەولێر راگەیاند: "بڕینی ئەو 100 هەزاری دەرماڵەیە بۆ مانگی یەك هۆكارەكەی هەرێمی كوردستان نییە، بەڵكوو پەیوەندیی بە وەزارەتی دارایی عێراقەوە هەیە و ئەوان لە مووچەی مانگی یەك خەرجیان نەكردووە و چاوەڕوانین لە مانگی دوو ئەو پرسە قەرەبوو بكرێتەوە."
سەرچاوەكە ئاماژەی بەوەش دا: "تەنیا ئەو 100 هەزار دینارە كەم كراوەتەوە، ئەگینا ئەوانەی پێشووتر مووچەیان هاوتا كراوە، خانەنشین بن یان میراتگرەكانیان، مووچەیان وەكوو خۆیەتی و بە هاوتاكراوی خەرج دەكرێت."
روونیشی كردەوە، ئەو 100 هەزار دینارە، كە بە دەرماڵەی گرانیی گوزەران ناو دەبرێت، بەهۆی نوێنەكردنەوەی فەرمانی ساڵانەی دەرماڵەكە، لەلایەن دارایی عێراق لە مووچەی مانگی 1ی 2025 نەبەستراوە و بابەتەكە پەیوەندیی بە هەرێمی كوردستانەوە نییە، بەڵكوو لە عێراق خەرج نەكراوە.
لای خۆیەوە بەڕێوەبەرایەتیی خانەنشینیی ڕاپەڕین، لە راگەیاندراوێكدا بڵاوی كردەوە: "لە مووچەی مانگی 1ی ساڵی 2025 دا بڕی 100 هەزار دینار لە مووچەی ئەو خانەنشینانە کەمدەکات، کە مووچەکانیان کەمترە لە یەک ملیۆن دینار."
ئاماژەی بە هۆكارەكە كردووە و هاتووە: "ئەم بڕە پارەیەش کە بریتییە (منحە - هاوکاری)، بە هۆکاری نوێنەکردنەوەی ڕەزامەندیی ساڵانەی ئەو بڕە هاوکارییەیە، بەڵام لە مانگەکانی داهاتوو لە کاتی نوێکردنەوە ئەو بڕە دەخرێتەوە سەر مووچەی خانەنشینان."
بەڕێوەبەرایەتیی خانەنشینیی ڕاپەڕین دەشڵێت: "سەبارەت بەو 100 هەزار دینارە، تکایە هەم لە بانك و هەم لەناو بەڕێوەبەرایەتیمان پێویست بە پرسیار و دڵنیاکردنەوە ناکات".
لە مانگی 10ی ساڵی 2023، ئەنجوومەنی وەزیرانی عێراق بڕیاری دا، وەكوو دەرماڵە 100 هەزار دینار بدرێتە ئەو خانەنشینانەی، كە مووچەیان لە ملیۆنێك دینار كەمترە و بڕیارەكەش لە مانگی11ی 2023وە جێبەجێ كرا.
وەڵام بدەوه