سبەیی دەست بە خەرجکردنی ئەم پارەیە دەکرێت

لە سایلۆی هەولێر و قوشتەپە، سبەی پارەی گەنم دابەش دەکرێ و جووتیارانیش لە چەند ڕێکارێکی خەرجکردن ئاگادار دەکرێنەوە.

سایلۆی هەولێر لە ڕاگەیاندراوێکدا بڵاوی کردەوە: "جووتياران ئاگادار دەکەینەوە، سبەی پێنجشەمە، 2024/9/19 دابەشکردنی چەکی جووتياران لە زنجیرە 745 تاکوو زنجیرە 950 دەست پێدەکات، کە گەنمەکانیان رادەستی سایلۆی هەولێر کردووە."

ئاماژە بەوەش کراوە، هەروەها سایلۆی قوشتەپە لە زنجیرە 24 تاکوو زنجیره 200 دەست بە دابەشکردنی چەکی جووتياران دەکات، کە گەنمەکانیان رادەستی سایلۆی قوشتەپە کردووە، هەر لە سايلۆی قوشتەپەش چەک وەردەگرن.

ئاشکراشی کردووە، لە کاتژمێر نۆی بەیانی تاکوو دووی دوای نیوەڕۆ چەک دابەش دەکرێت و جووتیاران پارەکانیان لە بانکی بەحرکە وەردەگرن.

سایلۆی هەولێر ڕاشیگەیاندووە، ئەو کەسەی چەکی بەناوە دەبێت خۆی ئامادەبێت، یاخود بریکارنامەی پەسندکراوی ئەمساڵ بێت و ئەگەر خاوەن چەک وەفاتی کردبێت، دەبێت دابەشنامەی (شرعی یان یاسایی)، لەگەڵ بریکارنامەی گشت میراتگرەکان بهێنێت.

پێشتر ڕۆژی 9ی9ی2024، سەروەر کەمال هاواری، بریکاری وەزارەتی بازرگانی و پیشەسازیی حکوومەتی هەرێمی کوردستان، راگەیاند: "کۆمپانیای بازرگانیی دانەوێڵەی عێراق، بۆ بەشی شەشەمی پارەی گەنمی جووتیاران، نزیکەی 150 ملیار دیناری ناردووە."

ئاشکرای کرد، بڕی پارەکە بۆ هەولێر 47 ملیار و 373 ملیۆن دینارە، بۆ سلێمانی 67 ملیار و 841 ملیۆن دینارە بۆ دهۆک 35 ملیار و 541 ملیۆن دینارە.

سەروەر کەمال هاواری ڕوونیشی کردەوە، پێش ناردنی ئەو 150 ملیار دینارە، 483 ملیار دیناری پارەی ئەمساڵی گەنم مابوو بنێردرێت، گوتیشی: "نزیکەی 333 ملیار دینار دەمێنێت بنێرن، ئەوەی ناردراوە وەجبەی شەشەمە و بۆ وەجبەی حەوتەمیش لەسەر هێڵین، بەڵکوو زوو بنێردرێ."

لەدوای 20ی7وە، کە پرۆسەی وەرگرتنی گەنم لە کوردستان تەواو بوو، پارەی گەنم لە بەغداوە نەنێردرابوو، بەڵکوو تەنیا 77 ملیار و 500 ملیۆن هاتبوو، ئەویش دابەش کرا.