راگەیاندراوێک لەبارەی لیستی مووچە

لیژنەی باڵای بایۆمەتری جەخت دەکاتەوە، حکومەتی هەرێمی کوردستان شەفافانە لیستی مووچەی سەرجەم مووچەخۆرانی لەسەر بنەمای داتا و زانیارییەکانی بایۆمەتری هەموو مانگێک لەگەڵ تەرازووی پێداچوونەوەی داهات وخەرجییەکان پێشکەش بە حکومەتی فیدراڵیی کردووە. لیژنەی باڵا بایۆمەتری ڕایگەیاند: هەموو وەزارەت، دامەزراوە، دەستە، فەرمانگەکان و یەکە ژمێریارییەکانمان ڕاسپارد هەماهەنگیی زیاتریان هەبێت بۆ ئەوەی پڕۆسەی ئامادەکردنی لیستی مووچە خێراتر و بێ کەموکوڕی بێت، لەسەر بنەمای ئەو زانیارییانەش مانگانە تەمویلی مووچەخۆرانی هەرێمی کوردستان دەکرێت و گرنگە ڕێگە نەدرێت هیچ بەربەستێکی تەکنیکی ڕێگر بێت لەم پرۆسەیەدا. لیژنەی باڵای بایۆمەتری جەخت دەکاتەوە کە هەر مووچەخۆرێک تۆمار نەکرابێت و گرفتی یاسایی نەبێت، ئاسانکاری بۆ بکرێت بۆ تۆمارکردن بەپێی ڕێکار ومیکانیزمە کارپێکراوەکان.