ھەواڵی نوێ لەبارەی مووچەی ھێزە ئەمنییەکان

ئاوات شێخ جەناب، وەزیری دارایی و ئابووری هەرێمی کوردستان ڕایدەگەیێنێ، لێکتێگەیشتن و بەرەوپێشچوون بۆ چارەسەری کێشەی مووچە هەیە و چەندجارێک وردبینی لە لیست و ناوی هێزە ئەمنییەکان کراوە، هەرچەندە بەپێی بڕیاری دادگای فیدراڵی نابێت هیچ کێشە و هۆکارێک ببێتە هۆی دواکەوتن و نەدانی مووچە، بەڵام بە بیانوی وردبینییەوە هەموو مانگێک کێشەیەکی نوێ بۆ مووچە دروست دەکەن. وەزیری دارایی دەڵێت: لەکاتێکدا بەپێی یاسای بودجە دەبێت سێ مانگ جارێک وردبینی لە خەرجی و داهات بکرێت، هەرێمی کوردستان پابەندییەکانی خۆی جێبەجێ کردووە لەوانە گەڕانەوەی بەشی گەنجینەی فیدراڵی لە داهاتی نانەوتی هەرێم و ڕادەستکردنی لیست و ناوی هێزە سەربازی و ئەمنیەکان و بەردەوامی بە بانکیکردنی مووچەی فەرمانبەرانی هەرێمی کوردستان و ناردنی ڕاپۆرتی تەرازووی پێداچونەوەی مانگانە.