لیستی مووچەی مانگی سێ ئامادە دەکرێت

وەزارەت و فەرمانگەكان و دەستەكانی حكوومەتی هەرێمی كوردستان، دەستیان بە ئامادەكردنی لیستی مووچەی مانگی سێی مووچەخۆران كرد.

دوێنی چوارشەممە 27/3/2024، سەرجەم بەڕێوەبەرانی میلاکی وەزارەت و دەستەکان لەگەڵ بەڕێوەبەرایەتیی ژمێرکاری کۆ بوونەوە بۆ وەرگرتنی زانیاری لەبارەی چۆنیەتیی ئامادەکردنی لیستی مووچە کە بە جۆرێک پلەبەرزکردنەوەی فەرمانبەرانیشی لەگەڵدا بێت، ئەمڕۆ پێنجشەممە 28/3/2024، سەرجەم وەزارەت و فەرمانگەكان و دەستەكانی حكوومەتی هەرێمی كوردستان، خشتەی ئامادەکارییەکانی لیستی مووچەیان بۆ ڕۆشتووە و لەمڕۆوە دەستیان بە ئامادەکردنی لیستی مووچەی مانگی سێی مووچەخۆران كرد، كە بڕیارە لە ماوەی هەفتەیەکدا لیستەکە ئامادە بکرێت و بۆ بەغدا بنێردرێت.

دوێنێ چوارشەممە، مەسرور بارزانی، سەرۆكی حكوومەتی هەرێمی كوردستان، چەند بڕیارێكی لە بەرژەوەندیی هاووڵاتییان دا و ئاماژەی بەوە دا: "وەزارەتی دارایی و ئابوورییم راسپاردووە دەست بکەن بە دابەشکردنی مووچەی مانگی دوو و ئامادەکاریش بکەن بۆ دابینکردنی مووچەی مانگی سێ و مانگەکانی داهاتووش.

سەرۆكی حكوومەت ئەوەشی خستە ڕوو: لە بەرژەوەندیی خەڵکی کوردستان ئێمە هەندێک بڕیاری ترمان لە ئەنجوومەنی وەزیران داوە بۆ ئەوەی بتوانین ئەم بارە قورسە ناهەموارە ئابوورییەی کە کەوتووەتە سەر شانی خەڵکی هەرێمی کوردستان، تۆزێک بۆیان سووک بکەینەوە، بڕیارمان داوە وەزارەتی شارەوانی و گەشتوگوزار دەست بکات بە تەرخانکردن و دابەشکردنی زەوی بەسەر هەموو ئەو فەرمانبەرانەی کە تاوەکو ئێستا لە حکوومەت سوودمەند نەبوون."