وەزیری دارایی و ئابووریی حکوومەتی هەرێمی کوردستان ڕایگەیاند کە بەتەواوبوونی پرۆژەی (هەژماری من )، فەرمانبەران و مووچەخۆران لەچەندین خزمەتگوزاری دارایی و بانکی سوودمەند دەبن.
لە ڕاگەیاندراوێکدا وەزارەتی دارایی بڵاوی کردەوە، ڕۆژی چوارشەممە 24ی1ی2024، ئاوات جەناب نوری وەزیری دارایی و ئابووری سەردانی دیوانی پارێزگای سلێمانی کرد و تیمەکانی پرۆژەی (هەژماری من)ی لە نووسینگەی سەرۆک وەزیرانی هەرێمی کوردستان بەسەر کردەوە.
وەزیری دارایی لەلایەن دکتۆر هەڤاڵ ئەبوبەکر پارێزگاری سلێمانی پێشوازی لێکراو لە دیدارێکدا باسی لە گرنگی و بایەخی پرۆژەی (هەژماری من) کرد کە پرۆژەیەکی ستراتیژی گرنگە و لەلایەن تیمێک لە نووسینگەی سەرۆک وەزیرانی هەرێمی کوردستان بەهەماهەنگی لەگەڵ وەزارەتی دارایی ئەنجام دەدرێت.
ئەوەش خراوەتە روو، وەزیری دارایی پشتیوانی پارێزگاری سلێمانی بۆ سەرخستنی پرۆژەکە بەرز نرخاند و ڕایگەیاند: "پرۆژەی (هەژماری من) پرۆژەیەکی گرنگ و پێویستی ئەم قۆناغەیە و بەتەواوبوونی ئەو پرۆژەیە کێشەی کاش و نەبوونی سیولە بەتەواوی چارەسەر دەبێت و لەلایەن بانکە تایبەتەکانەوە چەندین خزمەتگوزاری وەک پێدانی قەرزو سلفە پێشکەش بەفەرمانبەران دەکرێت، جگە لەوەش فەرمانبەر دەتوانێت پرۆسەی حەواڵە و کڕینی کاڵا بە شێوەی ئەلیکترۆنی و ڕاکێشانی پارە لەوڵاتان و چەندین کارئاسانی تر لەڕێی کارتی هەژماری منەوە ئەنجام بدات.
روونیش کراوەتەوە، وەزیری دارایی لەگەڵ تیمی پرۆژەی (هەژماری من) سەرپەرشتی کۆبوونەوەیەکی کرد لەگەڵ سەرجەم بەڕێوەبەری بانکەکانی سنوری پارێزگای سلێمانی و هەڵەبجە و ئیدارە سەربەخۆکان و ئاوات جەناب نوری گرنگی و بایەخی پرۆژەی (هەژماری من)ی ڕوون کردەوە و ڕایگەیاند: "پرۆژەکە هەنگاوێکی ستراتیژییە بۆ ئایندەی هەرێمی کوردستان و داوای لێ کردن بەهەموو توانایانەوە کار بۆسەرخستنی پرۆژەکە بکەن تابتوانرێت بەر لەو وادەیەی بۆی دانراوە کارەکان تەواو بکرێت
وەڵام بدەوه