لەهەر شوێنێک حکومەت چاودێری بەسەر بازاڕەوە نەماو کۆنترۆڵی نرخ و کوالیتی و هەڵبەرزو دابەزی نرخەکانی لەدەست دەرچوو، جۆرێک لە بێ سەرووبەری و فەوزا باڵ بەسەر بازاڕو نرخی کاڵاو شتومەکەکاندا دەکێشێت.
کۆنترۆڵ کردنی بازاڕ لە لایەن حکومەتەوە هەم لە رووی دەروونی دڵنیایی دەبەخشێتە بەکاربەرانەوە، هەمیش بەرچاوروونی دەداتە حکومەت بۆ دابین کردنی ئەو کالاو پێداویستیانەی زۆرترین خواست و داواکاریان لەسەرە.
دڵنیایی بەخشینی حکومەت بەوەی حکومەت چاودێرە بەسەر کوالێتی کاڵا هاوردەکراوو بەرهەمە ناوەخۆییەکانەوە، وادەکات هاوڵاتیان متمانەی زیاتریان بە حکومەت و دامودەزگاکانیەوە هەبێ و لە کواڵیتی کڕین و فرۆشتنی کاڵاو پێداویستیەکان دڵنیا بن.
بەڵام ئەگەر حکومەت ئاگاداری جوڵەی بازاڕو بازڕگانیەوە نەبێ و کۆنترۆڵی بازاڕی لەدەست دەربچێ، جۆرێک لە ئاڵۆزی و پشێوی شاراوە لە بازاڕ دێتە کایەوەوە هەندێ لە بازرگانە چاوچنۆکەکان بۆ دەست خستنی زۆرترین قازانج و دەست مایەی خەیاڵیەوە، بە ئارەزووی خۆیان بەزمی و نزمی بە نرخەکانەوە دەکەن یا کاڵاکان دەشارنەوە تا دواتر بە چەند قات بیانفرۆشنەوە.
بێگومان دەرەنجامی ئەم دۆخەش هەژار کەوتنی زێدەتری بەکاربەران و هاوڵاتیە دەست کورت و نەدارەکانی کۆمەڵگەی لێدەکەوێتەوەو درز و کەلێنی نێوان چینی هەژارو دەوڵەمەندەکان زیاترو گەورەتر دەبێ و بە پشێوی بازاڕو دۆخێکی درێژخایەنی هەڵاوسانی ئابوری و لە زۆرحاڵەتدا نائارامی کۆتایی پێ دێ.
وەڵام بدەوه